Universidade Nacional Timor Lorosa’e (UNTL) liuhusi Direção Nacional de Logística e Manutenção ( DNLM) ho Direção Nacional de Património e Bens (DNPB), rekolla patrimóriu ne’ebé kategoria sasan sira ne’ebé la uza iha Polo Gleno no Liquiça hodi tau iha Armajen Hera hodi hein prosesu tuir mai, aumezmu tempu ekipa DNLM identifika mos ba liña eletrisidade ho fasilidade sira seluk iha polo.
“Diresaun ho ekipa mai rekolla sasan ne’ebé aat no labele uza ona iha Polo Gleno ho Liquiça, hanesan faze dahuluk ita mai rekolla, tanba kondisaun aat ona, nune’e sasan hirak ne’e sei lori ba tau iha Armajen Hera hodi hein prosesu tuir mai, halo leilaun ka harahun depende ba sasan-nia kondisaun ne’ebé bazeia ba dekretu lei 32/2011”, Dehan Diretora DNLM Sra. Fátima Odete Monteiro, iha Polo Gleno-Ermera (17/03).
Diretora hatutan, relasiona ho prosesu atu halo leilaun ba sasan hirak ne’e, DNLM, haruka ona proposta dahuluk ba Patrimóniu Estadu hodi hetan aprovasaun ba leilaun.
“Leilaun nia prosesu ne’e depende ba Patrimóniu Estadu nian, sira mak sei fó nia mekanismu mai, nune’e ami sei manda karta ho kuantidade sasan ne’ebé iha no sira sei tun halo verifikasaun ba sasan sira iha armajen UNTL nian, hodi haree tama iha kategoria leilaun ka harahun”, Tenik Diretora.
Sasan hirak ne’ebé rekolla mak hanesan, armariu, kadeira, kulsaun, mákina fase ropa, komputadór, televizaun, meza no gas protesaun.
Média
: Domingos Amaral
: Domingos AmaralFoto 
: Mario Jonio Mendonça
: Mario Jonio Mendonça