
Universidade Nacional Timor Lorosa'e (UNTL), Faculdade de Engenharia Ciência e Tecnologia (FECT), nia estudante husi Departamento de Engenharia Eletrónica e Elétrica, Afonsiano Viera Soares Ximenes, aprezenta peskiza ba Konsellu Ezaminadór sira kona-ba robot tesi duut ne'ebé bele kontrola husi telemovel liuhusi liña internet.
Iha sesaun ezame ne'e, Mestre Rui Manuel Sarmento hanesan orientadór iha Laboratoium FECT-Hera (20/01), hateten, projetu ne'e ba traballu final ba kursu ne'ebé estudante halo mákina tesi duut no kontrola husi telemovel no liña internet.
"Estudante ne'e aprezenta ninia traballu final halo mákina tesi duut ho modernu, ne'e hanesan projetu ida atu aplika ba komersiu maibé presiza dezenvolve liutan mákina nia kapasidade, nune'e bele hakman ita-nia servisu ho lalais", Dehan Orientadór.

Estudante finalista Afonsiano Viera Soares Ximenes hateten, traballu final refere foku produsaun robot tesi duut, ne'ebé kontrola husi telemovel no internet, tanba dezenvolvimentu teknolojia ne'e la'os iha rai-liur mak bele, maibé iha Timor mós bele.
"Ha'u nia peskiza traballu final kona-ba mákina modernu, liuliu robot tesi duut no kontrola husi telemovel no internet, atu transforma fila-fali idea ne'ebé ita iha ba sasan no sistema ne'ebé durante ne'e ita estuda hodi aplika ba iha prátika", Tenik Afonsiano.
Média
: Denilson Amandio Barros

Foto
: Agostinho da Cruz
