Universidade Nacional Timor Lorosa'e (UNTL) liuhusi Faculdade de Ciências Sociais nia Departamento de Comunicação Social hamutuk ho World Vision Timor-Leste realiza talk show ho tema Perigu Hedrometeolójiku (Bailoro Naruk no Inundasaun), iha Auditorium FCS Caicoli, Díli (07/12) hodi komemora loron Invazaun Indonézia nian iha Timor-Leste ba dala 49 (7 dezembru 1975 - 7 dezembru 2024).
Objetivu husi atividade ne'e atu atualiza informasaun ba públiku liuliu ba estudante akadémiku sira kona-ba bailoro naruk no inundasaun oinsá atu bele prepara aan hodi hasoru situasaun sira hanesan menus ai-han no bee, nomós atu hadok aan husi dezastre sira, tanba bele fó impaktu ba ema nia vida, nomós hodi komemora loron invazaun Indonezia iha Timor-Leste ba dala 49 (1975-2024).
Orador ba iha talk show ne'e mai husi Autoridade Protesaun Civil, Ofisial Avizu Sedu CNOPS Sr. Joviano Fonseca, Ministériu Agrikultura Pekuária Peska no Floresta (MAPPF) nia Tékniku Agrometeorolojia Sra. Rita da Costa, Raes Hadomi Timor Oan nia Koordenadora Programa Dezastre AHP, Sra. Ernestina da Costa, Ministériu Transporte no Komunikasaun nia Ofisial Meteorolojista DNMG Sr. Simão Telles, World Vision nia Jerente Asuntu Emerjénsia no Umanitária, Sr. Zito Afranio Soares, no Grupu Sistema Informasaun Geografia, Sra. Julmira de Almeida.
Atividade ne'e realiza, tanba Departamento de Comunicação Social servisu hamutuk ho World Vision no hetan apoiu husi Governu Australia liuhusi Australian Humanitarian Partnership.
Partisipa iha atividade ne'e Diretor Departamento de Comunicação Social Mestre Roberto da Costa Pacheco, Dosente, Funsionáriu, estudante no ekipa husi Rádio Komunidade sira.
Média UNTL 
: Domingos Amaral
: Domingos AmaralFoto
: Domingos Amaral
: Domingos Amaral