Universidade Nacional Timor lorosa’e (UNTL) nia Faculdade de Educação Artes e Humanidades (FEAH) realiza Judisium ba dala XXXI hodi atribui títulu akadémiku ba finalista hamutuk atus haat sianulu resin hitu (497), iha Salaun Oka, Hudi Laran, Díli (6/12).
Magnífiku Reitór Interinu no atuál Visereitór ba Asuntu Pós-Graduasaun no Peskiza (VRAPGP) Profesór Afonso de Almeida hatete, Judisium nu’udar momentu reponsabilidade ba finalista sira, liuliu ba finalista sira ne’ebé konsege finaliza ona estudu iha universidade.
“Serimónia Judisium nu’udar momentu responsabilidade ida ba finalista sira, tanba dezafiu ezije korajem atu bele atinji objetivu liuhusi votande joven sira-nian, tanba mundu presiza lider no edukadór sira hanesan imi, tanba ne’e bainhira ita iha mehi as mak vizaun sei luan liután hodi bele haree mundu ho asaun, tanba desizaun hotu iha finalista sira-nia liman”, dehan Profesór Afonso.
Dekanu FEAH nian, Profesór Teodoro Soares agradese ba parte hotu nia apoiu ba finalista sira-nia prosesu to’o ikus remata ona estudu.
“Ha’u hakarak hato’o parabéns ba finalista sira no agradese ba parte hotu nia apoiu ba ita-nia oan sira ohin remata ona, maibé husu ba imi hotu atu kontinua iha vontade hodi bele aumenta tan estudu ba mestradu no doutramentu, tanba edukasaun ne’e importante tebes ba Timoroan sira”, dehan Profesór Teodoro.
Tuir reprezentante finalista Putri Valentina Marques Maia, agradese ba parte hotu nia apoiu hodi forma finalista sira sai koñesidu, kompetitivu no exelente, tanba ne’e dezafiu mak bele lori ema hodi hasoru futuru.
“Ami agradese ba parte hotu nia apoiu, tanba forma ona ami sai koñesidu, kompetitivu no exelente, tanba ne’e dezafiu mak bele lori ita ba hasoru futuru ne’ebé sei mai, wainhira hakat sai husi portaun UNTL, ita lori grau, mehi, aspirasaun no enerjia ne’ebé laiha limitasaun atu halo mudansa iha ita nia nasaun ida ne’e”, dehan Putri nu’udar mellor klasifikasaun husi Departamento do Ensino de Biologia.
Partisipa iha serimónia solene refere, Diretór Ezekutivu Fundu Dezenvolvimentu Kapitál Umanu nian, Profesór Julio Aparicio, Estrutura FEAH, Diretór Departamentu, Dosente, Inan Aman, estudante no konvidadu sira.
