Universidade Nacional Timor Lorosa’e (UNTL) liuhusi Faculdade de Medicina e Ciência da Saúde (FMCS) realiza Judisium hodi atribui títulu akadémiku ba finalista na’in atus neen tolunulu resin tolu (633), ho tema “Produzir Profisionais da Saúde Competentes, Adaptáveis, Creativos e Cívicos para Garantir o Direito a Qualidade de Serviços de Saúde” iha Salaun Oka nian, Díli (21/11).
Reprezentante Magnífiku Reitor no atuál Visereitór ba Asuntu Pós-Graduasaun no Peskiza, Profesór Afonso de Almeida hatete, Judisium marka pasu importante ba graduadu sira tanba ne’e selebra susesu ba sira-nia esforsu, dedikasaun no dezafiu sira ne’ebé enfrenta iha tempu naruk durante perkursu. Ida ne’e hanesan tempu orgullu ba UNTL forma Medisina no Siensia Saúde atu assume responsabilidade hodi kuida ema nia vida.
“UNTL fó felisitasaun makaas ba graduadu ne’ebé ohin konklui ona estudu no ha’u hakarak espresa mós sentimentu gratidaun ba Profesór no Funsionáriu FMCS nian ne’ebé ho dedikasaun nomós agradese ba família nia konfiansa ba oan sira mai estuda iha UNTL nomeadamente FMCS”, Dehan VRAPGP.
Iha fatin hanesan, Ministro Ensino Superior, Ciência e Cultura (MESCC) S.E. José Honório da Costa Perreira Jerónimo kongratula ba finalista sira, tanba hakotu ona estudu iha universidade hodi tama ona ba vida sosiedade.
“Imi-nia kursu sira-ne’e halo remata atu bele serbí komunidade, imi tenki kaer metin imi-nia juramentu ne’ebé ohin imi halo atu serbí ita-nia komunidade ho di’ak, tanba Timor-Leste presiza ida-ne’e. Hanesan Ministru nafatin fó apoiu atu ita bele melhora di’ak aprendizajen iha UNTL no husu ba imi hotu atu respeita malu, respeita feto sira no profesór sira mós haree estudante sira nu’udar oan rasik’’, Dehan MESCC José Honório.
Dekana FMCS Profesora Lidia Gomes hatete, Judisium nu’udar progresu importante iha perkursu akadémiku no juramentu profisional husi finalista sira, maibé mós hanesan komprimísiu instituisaun nian hodi forma profisional saúde ne’ebé kompetente, integridade no kompetetivu.
“Tema ba Judisium ohin nian maka atu refleta ita-nia vizaun iha komitmentu no responsabilidade iha preparasaun ba jerasaun profisional saúde ne’ebé forte no integridade iha dedikasaun, prontu atu serbí komunidade ho profesionalizmu ho empatia ne’ebé di’ak’’, Dehan Dekana Gomes.
Judisium ne'e ba finalista 633 kompostu husi, Departamento de Farmacia (130), Departamento Ciências Biomedicas Laboratoriais (138), Departamento de Nutrição Dietetica (86), Departamento de Parteira (134) no Departamento Enfermajen (145).
Média UNTL 
: Laurindo da Cruz Gomes
: Laurindo da Cruz GomesFoto
: Mario Jonio Mendonça Martins
: Mario Jonio Mendonça Martins