Universidade Nacional Timor Lorosa’e (UNTL) nia Magnífiku Reitór Profesór dr. João Soares Martins, MPH,Ph.D asina akordu ho Prezidente Comite Orientadór 25 Sr. Constâncio da Conceição Pinto “Terus” iha Sala-Videokonferénsia UNTL nian, Díli (21/11) hodi koopera iha área peskiza ba istória no publikasaun.
Reitór agradese, tanba husi kooperasaun atu bele dokumenta istória Timor-Leste nian nune’e jerasaun tuir mai bele hatene no komprende prosesu ukun rasik aan.
“Agradese tebes ba kooperasaun ne’e hodi habelar ita-nia istória luta nian, tanba ne’e husi kooperasaun ida-ne’e bele dokumenta ita-nia istória ne’ebé iha relasaun ho luta ba Timor-Leste ninia di’ak, maske UNTL ho Comite foin asina akordu, maibé ami-nia dosente sira apoiu dezde inísiu mai to’o ohin loron, maibé ba oin ita bele haree hamutuk peskiza nian no dezelvolve livru sira ne’ebé nesesáriu”, dehan Reitór.
Prezidente Comite Orientadór 25 nian, Sr. Constâncio da Conceição Pinto “Terus” hatete, kooperasaun informalmente lao kleur ona, tanba dosente barak mak apoiu ona Comite, maibé asina akordu atu bele apoiu iha área peskiza no publikasaun.
“Ami agradese ba kooperasaun ne’e, no atu dehan de’it katak UNTL nia kooperasaun informal lao kleur ona, tanba Dosente UNTL sira sempre apoiu iha peskiza no hakerek ona livru ida no sei lansa iha tinan oin, maibé rekomenda hela katak se bele loke mós kursu Istória iha UNTL nune’e bele haforsa no habelar istória ba mundu”, dehan Prezidente Comite.
Asinatura MoU ne'e, akompaña husi Proreitór ba Asuntu Kooperasaun nian, Profesór Tomé Xavier Jerónimo, asistente tékniku no ekipa husi Comite Orientadór 25 nian.
Média UNTL 
: Leonia de Araújo da Costa
: Leonia de Araújo da CostaFoto
: Leonia de Araújo da Costa
: Leonia de Araújo da Costa