Universidade Nacional Timor Lorosa'e (UNTL) nia estudante na’in atus ida ualu (108) husi Faculdade de Turismo Arte, Indústrias Criativas e Culturais (FTAICC) konsege hala’o atividade oioin tantu fíziku no non-fíziku durante Estájiu Servisu Sosiál (ESS) iha Munisípiu Ataúro.
Relasiona ho atividade sira reprezentante Komunidade Sra. Marta Joaquim Pessoa agradese ba estudante sira, tanba sira bele prodús lixu-fatin nomós fó formasaun ba komunidade no estudante sira kona-ba oinsá kuidadu fatin turismu sira iha área Atauro nian.
"Ha'u agradese ba oan estudante sira mai estájiu iha ne'e, tanba sira mai halo ona Lixu fatin no fahe formasaun. Sira mós halo turismu komunitáriu iha tasi ibun, besik kedas baibain pasajeiru sira ba mai nian", agradese Marta.
Estajiáriu Nicodemos Santa da Costa hatete, atividade ne'ebé sai prioridade ba sira, durante Estájiu Servisu Sosial mak hanesan, atividade Fiziku (Halo Lisu fatin, Photo Rood, Halo Kuadru Avizu) no Non-Fiziku (Halo sosializasaun ba kada eskola no fo formasaun lian Inglés no seluk tan ba estudante).
"Atividade ne'ebé tuir prioridade mak, durante estájiu atividade fiziku mak ami halo lixu-fatin, hadia komunidade nia haris-fatin, kria mós Photo Rood. Enkuantu atividade non-fiziku mak halo sosializasaun ba kada eskola no ami mós fahe koñesimentu sira hanesan, lian Inglés no formasaun sira seluk", dehan Nicodemos.
Iha sorin seluk reprezentante, Inan-Aman Teresa Soares husi Suku Vila Maumeta, esplika atividade ne'ebé sira halo mak kria Lixu fatin rua no fo formasaun tama sai eskola, ne'ebé importante ba komunidade Ataúro.
"Ha'u kontente loos, tanba sira mai halo ona sampah fatin rua no ha’u haree sira fahe informasaun iha eskola sira. Ha’u hanoin loos sira, tanba mai ha’u haree nu'udar ha’u-nia oan rasik no ha'u hato'o hela lia menon ba sira katak, eskola halo didi’ak to remata", dehan reprezentante Inan-Aman Teresa.
Média UNTL 
: Leonia de Araújo da Costa
: Leonia de Araújo da CostaFoto 
: Mario Jonio Mendonça & Domingos Amaral
: Mario Jonio Mendonça & Domingos Amaral