Universidade Nacional Timor-Lorosa’e (UNTL) nia Faculdade de Ciências Sociais liuhusi Departamento de Comunicação Social (DCS) realiza atividade espozisaun ho tema “Papél Média Liuhusi Aprezentasaun Espozisaun Obra Estudante” durante loron tolu, iha Kampus Kaikoli FCS, Díli (03/10).
Iha diskursu Diretór DCS Profesór Roberto da Costa Pacheco hateten, atividade ne’e importante tebes ba estudante sira atu partilla sira-nia koñesimentu ho espozisaun foto, filme dokumentáriu no semanáriu, tanba atividade sira hanesan ne’e sei la hetan iha aula laran.
“Atividade ne’e estrakurrikulár ne’ebé estudante sira sei la hetan iha aula-laran, tanba ne’e aproveita didi’ak atu sai naroman no ibun ba sosiedade, presiza kadi bebeik ita nia kakutak, tanba iha ita-nia slogan katak bainhira ha’u la lee oinsá atu hakerek, nune’e ita boot sira mós atu haklean koñesimentu liuhusi prátika foti foto jornalizmu no filme dokumentáriu balu ida ne’ebé di’ak liu”, dehan Diretór.
Iha fatin hanesan, Sekretáriu Estadu Komunikasaun Sosial ( SEKOMS), S.E Espedito Dias Ximenes hateten, papél média importante iha dezenvolvimentu nasaun nian, liuhusi media konvensionál hanesan televizaun, radiu, jornal nomós plata forma dijitál sira.
“Ha’u hein katak estudante komunikasaun sosial sira iha futuru bele sai jornalista iha Timor-Leste, tanba teoria ne’ebé durante ne’e imi hetan iha departamentu konserteza presiza mós esperiénsia iha terenu hodi halo prátika bazeia ba teoria ne’ebé imi hetan”, dehan SEKOMS.
Atividade expozisaun ne’e abertura husi Sekretáriu Estadu Komunikasaun Sosial, S.E. Espedito Dias Ximenes no partisipa husi Vise-Dekanu Asuntu Akadémiku Profesór José da Magno ho estrutura Faculdade Ciências Sociais nian, dosente, konvidadu no estudante Komunikasaun Social UNTL no UNITAL.
Média UNTL 
: Domingos Amaral
: Domingos AmaralFoto 
: Mario Jonio Mendonça
: Mario Jonio Mendonça