Universidade Nacional Timor Lorosa'e (UNTL) nia Magnífiku Reitór Profesór dr. João Soares Martins MPH,Ph.D hamutuk ho Ministériu Ensinu Superior Siénsia no Kultura (MESSK) halo diseminasaun ba informasaun kona-ba asesu ensinu superiór públiku tinan 2025 nian, iha Salaun Munisípiu Autoriedade Ermera, Gleno (19/09).
Reitór hatete, UNTL hamutuk ho MESSK mai fahe informasaun kona-ba oinsa estudante no joven timoroan sira bele asesu ba ensinu superiór públiku hanesan UNTL no Instituto Pollitecnico Betano (IPB).
"Ohin ami mai iha ne'e ho objetivu atu halo diseminasaun informasaun kona-ba asesu ensinu superiór públiku, tanba ne'e iha Timor-Leste ita iha deit institutu públiku ida mak IPB no universidade públliku mak UNTL, selu propinas baratu, ita mós iha ensinu kualifikadu, tanba dosente sira barak mak mestradu no doutoramentu, inklui fasilidade sufisiente ba estudante sira", dehan Reitór.
Diretór Diresaun Nacional Ensinu Superiór-MESSK nian, Sr. Higino Alves, husu ba diretór no reprezentante kada eskola inklui autoriedade lokal sira iha Munisípiu Ermera to'o ba suku sira, atu hatutan informasaun ho didiak ba joven no estudante finalista sira.
"Ha'u husu ba Diretór eskola sira iha ne'e ho reprezentante sira, autoriedade lokal, xefe suku sira atu kontinua hatutan informasaun ne'e ho didiak ba joven sira no finalista sira ne'ebé mak remata eskola hakarak mai kontinu iha ensinu superiór públiku hanesan UNTL no IPB", dehan Diretór DNES.
Iha diseminasaun ne'e, aprezenta perfil UNTL no maneira asesu ensinu superiór husi Proreitór ba Asuntu Monitorizasaun no Avaliasaun Profesór José Nelson Salsinha. Enkuantu Sr. Agustinho S.G. da Costa apresenta kona-ba kritéria sira atu asesu tuir rejime jeral no rejime espesial, Koordenador IPB Sr. Jose Mendes aprezenta kona-ba oinsa asesu ba IPB no nia fasilidade sira.
Partisipa husi Diretór Diresaun Nacional Reseitas nian, Sr. Mateus Amaral , Secretaria Asunto Sosial representa Prezidente Autoriedade Munisípiu Ermera nian Sra. Paulina do Rosario Lemos, Chefe Departamento Desenvolvimnto Gestão Parque Escolar representa Diretor Educação Munisípiu Ermera nian Sr. Cosme Salsinha, Diretór eskola sira iha Munisipiu Ermera, Xefe Suku no konvidadu balu.
Média UNTL 
: Leonia de Araújo da Costa
: Leonia de Araújo da CostaFoto 
: Leonia de Araújo da Costa
: Leonia de Araújo da Costa