Universidade Nacional Timor Lorosa’e (UNTL) nia Faculdade de Engenharia Ciência e Tecnologia (FECT) sei halo mákina prodús tua sabu modernu hodi oferese ba benefisiáriu sira iha munisípiu bazeia ba rezultadu peskiza ne’ebé iha, FECT (20/09).
Vise-Dekanu ba Asuntu Kooperasaun no Peskiza Profesór Domingos de S. Freitas informa, mákina ne’ebé FECT sei prodús ne’e orsamentu finansia husi MCI bazeia ba memorandu ne’ebé asina ona.
“Kooperasaun entre Faculdade de Engenharia Ciência e Tecnologia (FECT) ho Ministério Comércio e Indústria (MCI) kona-ba prodús mákina tua sabu hodi oferese ba benefisiáriu sira bazeia ba rezultadu peskiza ne’ebé ita halo no identifika”, dehan Profesór Domingos.
Profesór ne’e salienta, mákina sira-ne’e atu ajuda komunidade sira ne’ebé uza de’it sistema manual hodi halo produsaun ba tua sabu, ne'e presiza tempu naruk no bele afeta mós ba sira-nia saúde.
“Mákina sira-ne’e nia funsaun atu ajuda komunidade sira ne’ebé ita ba identifika katak sira-nia mákina ne’ebé sira utiliza ne’e hanesan manual de’it no lakon tempu barak liu, nune’e ita hakarak modifika sira-nia mákina ho modernu nune’e bele redus tempu no hasa’e kuantidade produsaun”, dehan.
Mákina ne’ebé sei prodús hamutuk unidade sanulu (10) mak hanesan mákina produsaun tua sabu, press nuu, hamaran produtu lokal, fibra nuu kulit no mákina halo manutensaun no mákina hirak ne’e sei prodús husi dosente FECT no envolve mós estudante sira.
Média UNTL 
: Domingos Amaral
: Domingos AmaralFoto 
: Agustinho da Cruz & Jaimito Caldas
: Agustinho da Cruz & Jaimito Caldas