Universidade Nacional Timor Lorosa’e (UNTL) nia Magnífiku Reitór Profesór dr. João Soares Martins MPH, Ph.D hamutuk ho estrutura, públika ona lista estudante la ativu ne’ebé tama iha lista Drop Out (DO), konta husi tinan 2000 to’o 2012 ho total rihun sia atus rua limanulu resin tolu (9253), no sira ne’ebé halo ona readmisaun hamutuk 238.
Visereitór ba Asuntu Akadémiku no Garantia Kualidade (VRAAGQ) Prof. Dr. Samuel Venáncio de Sousa Freitas iha nia knár fatin (19/24) hatete, readmisaun ba estudante la ativu husi tinan 2000-2012 nian sei termina iha fim de outubru tinan ne’e.
“Readmisaun ba estudante la ativu husi tinan 2000-2012 sei remata iha 31 fulan Outubru tinan ne’e, no desizaun antes ne’e parte universidade foti mantein hodi implementa DO, karik liu ona data ne’ebé termina ba readmisaun nian, parte Universidade sei hasai naran husi sistema estudante UNTL nian, depois sei kontinua publika faze daruak nian ne’ebé sei desidi liuhusi reuniaun ho parte kompetente universidade nian”, tenik Visereitór.
Diretór Nasionál Atendimentu Estudante (DNAE) Rui Loco Pires hatete, parte DNAE durante ne'e halo ona readmisaun ba estudante la ativu hamutuk 238 bazeia ba despaxu husi VRAAGQ nian.
“Bazeia ba despaxu husi Visereitór ba asuntu Akadémika no garantia Kualidade nian mai iha DNAE rejista hikas estudante la ativu husi tinan 2000-2012 hamutuk 238, siginfika sei iha estudante la ativu hamutuk 9.015 mak seidauk mai halo readmisaun hodi ativa hikas hanesan estudante”, tenik Diretór DNAE.
Total estudante ne’ebé mak mai halo rejistrasaun mak hanesan Faculdade de Agricultura hamutuk (39), Faculdade de Engenharia Ciências e Tecnologia (7), Faculdade de Educação, Artes e Humanidades (71), Faculdade de Economia e Gestão (31), Faculdade de Direito (5), Faculdade de Ciências Sociais (76), Faculdade Turismo Arte e Indústria, Creativa e Culturais (9).
Média UNTL 
: Agostinho da Cruz e Silva
: Agostinho da Cruz e SilvaFoto 
: Domingos Amaral
: Domingos Amaral