Universidade Nasional Timor Lorosa'e (UNTL) nia Dekanu Faculdade de Agricultura (FAGRI) Dr. Vicente Paulo de Correia iha nia knaar fatin Kampus Sentral, Díli (17/09) hatete, fakuldade daudaun ne'e hala'o hela atividade peskiza iha área Agrikultura ho foku ba Agronomia, Ai Kulat, Emprendedorismu no Peska.
"Durante ne'e ami halo ona projetu peskiza iha área barak mak hanesan Agronomia, Ai Kulat, Enprendedorizmu no peskas, ami mos diskute hela kona-ba atu halo estudu peskiza kona-ba rai atu kuda modo, produtividade rai ba kafé nomós biodiversidade", dehan Profesór Vicente.
Profesór Vicente akresenta, peskiza hirak ne'e balun, benefisia mos estudante sira ne'ebe durante ne'e halo peskiza iha área enprendedorizmu, hakiak animal hanesan fahi no manu, nunee sira bele hetan finanseiru husi produtu hirak ne'e no sira rasik mak halo jestaun.
Atividade peskiza ne'e hetan apoiu husi UNTL rasik, Charles Darwin University (CDU), ACIAR (Australian Centre for International Agrucultural Research), United States Agency Internacional Development (USAID) no Governu Xina.
Média UNTL : Mario J. Mendonça
Foto : Domingos Amaral