Universidade Nacional Timo Lorosa'e (UNTL) nia Mangífiku Reitór Profesór dr. João Soares Martins, MPH, Ph.D ho Dekana Faculdade de Medicina Ciência e Saúde (FMCS) Profesora Lídia Gomes, asina akordu ho Faculty of Medicine and Veterenary (FMV) Universitas Nusa Cendana (UNC), iha Sala-Videokonferénsia UNTL nian, Díli (31/07), hodi koopera iha área Saúde Animal no Medisina Siénsia no Saúde nian.
Reitór hatete, kooperasaun ne'e importante tebes hodi bele fó benefísiu ba instituisaun rua nian, espera katak husi memorandu ne'e, parte rua bele buka solusaun hamutuk ba saida mak kursu Medisina no Saúde Animal presiza.
"Agradese tebes, tanba ohin ita hamutuk iha ne'e hodi asina akordu, nune'e ita bele koopera iha área Medisina nian, hein katak husi kooperasaun ne'e ita bele buka solusaun hamutuk ba nesesidade sira ne'ebé ita-nia FMCS no kursu Saúde Animal nian iha FAGRI", dehan Reitór.
Dekana Faculty of Medicine and Veterenary Universitas Nusa Cendana, dra. Christina O. Lada. M. Gizi hateten, akordu ne'e foku ba kursu Saúde Animal no mós area Medisina Siénsia saúde, espera katak kooperasaun ne'e bele hetan rezultadu di'ak iha futuru.
"Ami kontente tebes ohin bele hasoru malu ho UNTL hodi asina akordu, nune'e ita bele koopera iha kursu Saúde Animal nomós Medisina Siénsia no Saúde nian, hein katak husi ita-nia kooperasaun ne'e bele fó rezultadu di'ak", dehan Dekana Christina.
Partisipa husi Proreitór ba Asuntu Kooperasaun nian, Profesór Tomé Xavier Jerónimo, Visedekanu ba Asuntu Estudantil nian, Profesór Acacio de Jesus, no ekipa husi Universitas Nusa Cendana Indonesia.
Média UNTL 
: Leonia de Araújo da Costa
: Leonia de Araújo da CostaFoto 
: Leonia de Araújo da Costa & Domingos Amaral
: Leonia de Araújo da Costa & Domingos Amaral