Universidade Nacional Timor Lorosa'e (UNTL) nia Dekanu Faculdade de Turismo Arte Industria Criativas e Culturais (FTAICC), Profesór Feliciano Quintas do Ceo hatete, estudante sira tenke aplika siénsia ne'ebé aprende ba komunidade sira liuhusi Estájiu Servisu Sosial (ESS) durante fulan rua iha Munisípiu Ataúro.
"Ami agradese ba kolaborasaun di'ak, ohin ami entrega estajiáriu FATAICC nian hamutuk 105, sira-nia estájiu durante fulan rua, atividade rua mak sira sei halo hanesan, atividade fíziku no non fíziku, husi estajiu ne'e husu atu estudante sira tenke aplika saida mak sira aprende iha área turizmu nian ba komunidade Ataúro, tanba Ataúro mós iha poténsia ba turizmu", dehan Dekanu Feliciano bainhira entrega estudante sira ba Autoridade Ataúro nian.
Prezidente Autoridade Administrativa (PAA) Ataúro nian, agradese ba UNTL nia FTAICC bele haruka estudante sira mai hala'o estajiu iha ne'e, tanba Ataúro koñesidu ho túristiku, hein katak sira bele promove di’ak liutan fatin turizmu sira iha ne'e ba públiku.
"Ami-nia komunikasaun entre fakuldade ho Xefe suku sira la’o di’ak tebes, ami mós kontente no agradese ba UNTL nia FTAICC bele hili Ataúro hodi estájiu, tanba sira estuda Turizmu, espera katak ho sira-nia prezensa bele promove fatin turistiku sira iha Ataúro ba públiku", dehan Prezidente Autoriedade, iha Porto Beloi, Ataúro (30/07).
Reprezentante estajiária Denciana Bosco Fatima hatete, durante estájiu atividade rua mak sei implementa hanesan, atividade fíziku no non-fíziku bazeia ba nesesidade komunidade Ataúro nian, tuir kbiit estudante sira-nian.
"Ami sei ba hala'o estájiu durante fulan rua, atividade rua mak ami sei implementa nu'udar estájiu servisu sosial hanesan, atividade fíziku no non-fíziku, maibé ami sei implementa bazeia ba nesesidade suku nian tuir mós ami-nia kbiit, espera katak, ami sei kontribui no aprende buat ruma antes fila", dehan Nia.
Estudante hamutuk atus ida resin lima (105) mak sei hala'o estájiu servisu sosial iha Ataúro, durante fulan rua hahú husi loron 30 Jullu to'o 27 Setembru 2024.
Akompaña husi Visedekanu, Dosente Orientadór no Xefe suku husi suku tolu, hanesan Suku Vila Maumeta, Suku Biqueli no Suku Beloi inklui komunidade balu.
Média UNTL 
: Leonia de Araújo da Costa
: Leonia de Araújo da CostaFoto 
: Domingos Amaral & Altur Ramos
: Domingos Amaral & Altur Ramos