Universidade Nacional Timor Lorosa’e (UNTL) nia Proreitór ba Asuntu Dezenvolvimentu Institusionál Dr. Lelis Gonzaga hatete, konstrusaun edifísiu foun Laboratóriu Integradu ba Ciências Exatas ne’ebé sei konstrui iha Hera, prosesu to’o ona iha Gabienti Diresaun Nasionál Aprovisionamentu (DNA).
“Konstrusaun foun ba laboratórium integradu ba Ciências Exatas iha Hera, ne’e utiliza osan husi Kapitál Dezenvolvimentu nian, no prosesu ba edifísiu refere to’o ona iha Gabineti DNA-UNTL nian.
Faze tuir mak sei kontinua ba tenderizasaun, tanba hetan ona aprovasaun husi Ministériu Obras Públika no Ajénsia Dezenvolvimentu Nasionál (ADN)”, hateten Proreitór Lelis, iha nia knaar fatin, Kampus Sentrál UNTL nian, Díli (29/07).
Iha sorin seluk, Diretora Nasionál Aprovisiomentu (DNA), Sra. Virginia Ximenes da Silva hatete, Dokumentus ba edifísiu Laboratórium Integradu iha Hera, iha ona Gabineti Aprovisionamentu no loron 30 Jullu 2024 mak lansa liuhusi media sira ba públiku, liuliu kompañia sira atu bele kompete.
“Dokumentu sira kona-ba konstrusaun Laboratóriu Ingegradu iha Hera dadaun ne’e iha ona DNA nia fatin, dokumentu hotu preparadu hanesan projetu aprovisionamentu, desizaun abertura no dokumentu sira seluk ami prepara hotu ona, dia 30 Jullu 2024 ami publika liuhusi Jornal Timor Post, Pagina Oficial UNTL no Portal Ministériu Finansas nian, nune’e públiku liuliu kompañia sira bele kompete liuhusi konkursu públiku”, hateten Diretora DNA.
Diretora ne’e mós hatutan prosesu ne’e tama ona ba konkursu públiku, nune’e sei iha durasaun tempu tuir regra durante loron 120 mak prosesu aprovisionamentu remata.
Média UNTL 
: Agostinho da Cruz
: Agostinho da CruzFoto 
: Domingos Amaral
: Domingos Amaral