Universidade Nacional Timor Lorosa'e (UNTL) nia Magnífiku Reitór Profesór dr. João Soares Martins, MPH,Ph.D ho Ministru-Konselleiru Embaxada Repúblika Cuba nian, Sr. Pablo Romero Carmenatti, asina Memorandu-Entendimentu ho Diretór Ezekutivu Fundo do Dezenvolvimento de Capital Humano (FDCH) Sr. Julio Aparicio, iha Sala-Videokonferénsia UNTL nian, Díli (29/07).
Iha serimónia ne'e, Reitór agradese ba FDCH, tanba bele apoiu ona ba kontratu dosente sira husi Cuba hodi kontinua hanorin estudante sira iha Departamentu Desportu nian, inklui apoiu ba atividade estájiu, peskiza no atividade seluk iha UNTL.
"UNTL agradese tebes ba FDCH tanba ho esforsu tomak bele ajuda ona ba kontrata dosente hamutuk na’in-neen husi Cuba, tanba dadaun ne'e sira hanorin hela iha Departamento Ensino Fisica e Desporto (DEFD), Faculdade de Educação Artes e Humanidades (FEAH), no apoiu mós ba atividade estájiu, peskiza no atividade seluk iha UNTL", dehan Reitór.
Diretór Ezekutivu FDCH nian, Sr. Julio Aparicio hatete, ohin FDCH asina ona akordu ho UNTL no mos MES Cuba, hodi apoiu kontratu ba dosente na’in-neen (6) husi Cuba nian, nune'e bele kontinua hanorin iha DEFD-FEAH.
"Ohin asina akordu ho UNTL no Embaxada Cuba, tanba bazeia ba proposta husi UNTL no Embaxada Cuba katak, SEJD nia apoiu kontratu ba dosente sira husi Cuba ne'e remata ona, no UNTL laiha orsamentu atu kontinua, tanba ne'e FDCH apoiu hodi kontratu dosente hamutuk na’in-neen (6), hahú husi fulan Maiu-Dezembru tinan 2024, hodi bele kontinua hanorin estudante iha Ensinu Fizika no Desportu nian", dehan Diratór FDCH nian, Mestre Aparicio.
Ministru MES-Cuba nian, Konselleiru Sr. Pablo Romero Carmenatti hatete, profesor sira husi Cuba ne'e hanorin materia Desportu ba estudante Deprtamentu Desportu nian, tanba ne'e hato'o mós ba UNTL katak, iha kooperasaun durante ne'e dosente sira konsege tulun hanorin ona aula ba estudante sira.
"Ohin ami asina ona akordu ho FDCH hodi apoiu dosente sira-nia kontinuasaun hanorin iha UNTL liuliu área Ensinu Edukasaun Fízika no Desportu no ami hakarak informa mos katak dosente sira-nia prezensa durante ne'e, konsege tulun estudante sira aprende iha ensinu Desportu nian", tenik.
Partisipa husi Proreitór ba Asuntu Kooperasaun nian, Profesór Tomé Xavier Jerónimo, dosente na’in-neen husi Cuba, asistente tékniku no Diretór Departamento Ensinu Fisica e Desporto nian, Profesór Fransisco Barbosa no eikpa husi Embaxada-Cuba nian.
Média UNTL 
: Leonia de Araújo da Costa
: Leonia de Araújo da CostaFoto 
: Leonia de Araújo da Costa & Domingos Amaral
: Leonia de Araújo da Costa & Domingos Amaral