Universidade Nacional Timor Lorosa'e (UNTL) liuhusi Proreitora ba Asuntu Provedoria no Akonsellamentu (PRAPA) realiza misa agradesimentu ba graduadu na’in-rihun ida atus hitu ruanulu resin ualu (1728) ne’ebé prepara ona ba graduasaun iha període primeiru tinan akadémika 2024 nian ba dala XXX, iha Igreja Santo Antonio-Motael, Díli (8/07).
Iha omilia, Amo selebrante, Padre Frido Abel da Cruz hatete, joven tenke sai masin no naroman mundu nian, tanba ne'e graduandu sira tenke lori matenek ne'ebé hetan iha universidade hodi kontribui ba Dezenvolvimentu Nasaun nian, labele subar matenek no tenke hatudu nune'e sosiedade no Nasaun bele uza matenek sira-ne'e.
"Ohin ita halibur iha ne'e atu agradese ba Maromak ba grasa ne'ebé ita hetan, tanba ne'e joven sira tenke sai masin no naroman mundu nian, tuir leitura sira ohin ita rona.
Ha’u hakarak hatete ba imi katak, tenke hatudu koñesimentu ne'ebé ita hetan, labele subar masin no naroman ne'e, tanba ita subar mak ema sei la hatene no ema sei la uza", tenik Padre Frido.
Proreitora PRAPA nian, Profesora Teresa de Jesus Vaz Cabral, agradese ba família husi graduadu sira, liuliu inan-aman, tanba akompaña oan sira hahú husi foin moris to'o fó ba aprende edukasaun iha nivél as nian.
"Lori universidade nia naran, hakarak agradese ba inan-aman sira ne'ebé partisipa iha misa ida-ne'e, no sira la’ós foin akompaña deit iha ohin, maibé akompaña hahú husi foin moris to'o fó oan sira mai estuda iha nivél as to'o termina ona, espera katak sira bele rona omilia husi misa ida ne'e nian katak, joven mak masin no naroman mundu nian, tanba ne'e parabens ba ita boot sira hotu" dehan Profesora Teresa.
Misa agradesimentu ne'e, diriji husi Amu Kapelaun UNTL nian, Pe. Nivio Correia Lebre Fdcc no akompaña husi Padre Frido Abel da Cruz, Fdcc, Padre Clemente Morreira, Fdcc no Padre Ferdianos Nahak, Fdcc no partisipa husi dosente, funsionáriu, inan aman no graduando sira.
Média UNTL
: Leonia de Araújo da Costa
: Leonia de Araújo da CostaFoto
: Leonia de Araújo da Costa & Domingos Amaral
: Leonia de Araújo da Costa & Domingos Amaral