![450100213_122109000794385439_4489961616721424850_n.jpg](/images/450100213_122109000794385439_4489961616721424850_n.jpg)
Universidade Nacional Timor Lorsa’e (UNTL) liuhusi Visereitór ba Asuntu Akadémika no Garantia Kualidade Prof. Dr. Samuel Venâncio de Sousa Freitas, kolabora ho Departamentu Média no Komunikasaun (DEMCOM) realiza debate ho tema “UNTL À CONVERSA” hodi buka hatene fatór hirak ne’ebé mak impede estudante sira remata kursu kleur iha UNTL.
Liuhusi entrevista Profesór Dr. Samuel hatete, programa “UNTL à Conversa” konvida fonte mai husi Dosente, estrutura fakuldade no estudante atu hatene fatór sira ne’ebé mak halo estudante gradua kleur iha UNTL.
“Iha fulan hirak liubá hahú lansa pergunta dehan, tanba sa mak eskola hotu tarde, ne’ebé momentu ne’ebá ita hamosu diskusaun ho naran “UNTL À CONVERSA”, ita tau hamutuk interlokutór sira Dosente, Dirijente Fakuldade, no Estudante sira.
Liuhusi diskusaun ne’e sira partilla sira-nia esperiénsia no koñesementu ne’ebé bele ajuda UNTL atu hadia ba insusesu iha UNTL liuliu halo kursu hotu tarde”, hatete Prof. Samuel iha Kampus Sentral UNTL nian, Díli (26/06).
Eis Presidente Ajénsia Nasional Avaliasaun Akreditasaun Akadémika (ANAAA) dehan, durante diskusaun konsege deteta fatór balun ne’ebé mak liga fatór balun husi estudante no dosente sira.
“Ita iha transkrisaun gravadu no eskrita husi ita halo análiza ida fahe dimensaun haat mak hanesan, Pedagójika, Institusionál, Individuál, Esternu ne’ebé sai responsável ba estudante eskola hotu tarde nia rezultadu bazeia ba sira-nia konversa, momentu ne’eba ita kuandu hare’e ne’e barak liu mak hatur iha fatór ida pedagójika, nomós fatór institusionál”, hatutan Visereitór.
VRAAGK ne’e mós hatutan, alende UNTL à Conversa realiza mós workshop hodi halibur Dekanu no Vise-Dekanu, Diretór Departamentu sira, ho estrutura Reitoria nian halo verifikasaun no validasaun ba rezultadu ne’ebé simu iha konversa no notulénsia sira-ne’e, sei halo ba dokumentu ida hodi haruka ba fakuldade atu sai hanesan referénsia ida.