Universidade Nacional Timor Lorosa’e (UNTL) nia Center For Korean Studies (CKS) servisu hamutuk entre embaxada Timor-Leste nian iha Korea, Embaxada Korea iha Timor-Leste realiza Diskursu Públiku ho lian Korea ba Públiku hodi selesiona vensedor mellór ne’ebé atu ba partisipa iha diskursu Mundial badala 28 ne’ebé sei realiza iha fulan Agostu 2024 iha Laos.
Koordenadór CKS-UNTL nian Sr. Jose Viegas hatete, eventu ne’e realiza, tanba atu selesiona manan na’in ne’ebé di’ak iha diskursu ho lian Korea atu bele ba partisipa iha Diskursu Mundial iha Nasaun Laos iha Fulan Agostu ne’e.
‘’Eventu ida-ne’e loke jeral ba públiku no partisipante sira ne’ebé partisipa hamutuk 120, maibé sira ne’ebé pasa mai iha final ohin nian hamutuk na’in 8 mak atu kompete no ida mak sei sai hanesan vensedór/mellór nia mak atu ba partisipa iha Diskursu Mundial badala 28 iha Nasaun Laos’’. Dehan Jose, iha auditoriu AMRT nian, Díli (22/06).
Embaxadór Korea nian iha Timor-Leste Mr. Shin Mantaek hato’o parabéns ba partisipante sira ne’ebé bele partisipa iha eventu ne’e hodi aprezenta diskursu iha lian Korea ho di’ak, tanba sira ne’ebé sai manan na’in sei ba partisipa iha diskursu mundial iha nasaun Laos.
‘’Eventu ida-ne’e lori ita atu bele prepara aan didi’ak nomós bele atu haree oinsa ita-nia maneira atu hato’o mensajen no ida ne’ebé importante mak ita nia paragrafu dahuluk, ita tenki iha maneira atu bele kapta ema nia atensaun ba ita-nia aprezentasaun no husu ba imi hotu ne’ebé hatene lian Korea karik bele koalia halo makas tanba bele aplika ba bolsa estudu iha Korea no mós bele ba servisu iha Korea’’, dehan Embaxadór Mantaek.
Partisipante Hipolito Saldanha Vieira Branco sente kontente tebes, tanba bele sai hanesan vensedor iha diskursu lian Korea nian no nia mós hato’o agradese ba Maromak tanba bele tulun nia iha durante preparasaun sira no agradese mós ba manorin na’in ne’ebé tulun nia iha materia sira ne’ebé presiza.
‘’Ha’u sente kontente tebes no ha’u mós la espera katak ha’u bele sai manan na’in hau agradese ba Maromak tanba bele tulun hau ohin bele hetan nia finalidade agradese ba profesór sira-nia tulun, ha’u enkoraza nafatin ba kolega sira atu bele esforsu aan nafatin hodi aprende Lian Korea tanba opurtunidade mai ita tenki hatene lingua’’, dehan Hipolito.
Média UNTL 
: Laurindo da Cruz Gomes
: Laurindo da Cruz GomesFoto
: Leonia da Costa de Araujo
: Leonia da Costa de Araujo