Universidade Nacional Timor Lorosa’e (UNTL), liuhusi Diresaun Nasionál Rekursus Humanus, nia Diretór Cancio Monteiro, iha Kampus Sentral UNTL nian, Díli (18/06) hatete, tinan-tinan UNTL simu notifikasaun husi Komisaun Funsaun Públika (KFP) kona-ba funsionáriu sira ne’ebé tama ona idade reforma, maibé seidauk iha lei reforma obrigatóriu ida hodi implementa sistema reforma ba dosente no funsionáriu sira ne’ebé to’o ona idade neenulu (60), ba leten.
“Tinan-tinan, Ita simu ona notifikasaun husi KFP, maibé lei reforma obrigatóriu seidauk iha, tanba ne’e mak ita (DNRH) hein de’it funsionáriu sira ne’ebé tama ona idade reforma atu ho vontade individual hato’o pedidu mai rekursu umanu karik hakarak reforma ona, nune’e NDRH bele hato’o ba KFP atu prosesa reforma ba sira.
DNRH iha dadus liga ho dosente menus no dosente sira ne’ebé tama ona idade reforma, no tuir loloos ita presiza rekruta ona ema foun hodi apoiu servisu UNTL nian, maibé orsamentu UNTL nian la to’o atu halo rekrutamentu ba dosente no finsionáriu, tanba ne’e hein diskusaun foun iha konsellu jestaun atu esforsu oinsá bele responde ba dezafiu sira-ne’e iha tinan oin mai”, dehan Diretór Monteiro.
Diretór ne’e salienta katak, total funsionáriu ne’ebé idade tama ba reforma husi rejime espesial (dosente) hamutuk hitunulu (70) no rejime jerál (pesoál administrativu) hamutuk ruanulu resin neen (26) no funsionáriu hirak ne'e sei kontribui másimu hela iha universidade.
Média UNTL 
: Mario Jonio Mendonça
: Mario Jonio MendonçaFoto
: Leonia de Araújo da Costa
: Leonia de Araújo da Costa