Universidade Nacional Timor Lorosa’e (UNTL) liuhusi Faculdade de Ciências Sociais (FCS) nia Departamento de Sociologia (DS) nia estudante Jemarcia M. L. Soares Nunes, sente orgullu tebes estuda iha Departamento de Sosiologia hodi realiza nia futuru no aplika koñesimentu ne’ebé iha hodi kontribui ba sosiedade.
“Hanesan departamentu foun dadaun ne’e prosesu aprendizajen la’o di’ak tebes, iha semestre dahuluk tuir oráriu ne’ebé iha no matéria ne’ebé manorin sira hanorin hanesan métodu Traballu Sientífiku, Introdusaun Direitu, Intodusaun Siénsia Política, Língua Tetun, Língua Ingleza no Edukasaun Fízika no Étika liuhusi matéria sira-ne’e balun difisil, maibé ami nafatin iha vontade di’ak atu buka hatene hodi bele komprende di'ak liutan”, dehan Jemarcia, iha Kampus Kaikoli nian, Díli (20/06).
Estudante ne’e mós iha deseju katak, iha tinan oin estudante barak iha interese hodi estuda iha área Sosiolojia no espera mós iha futuru liuhusi koñesimentu ne’ebé iha bele aplika fali ba iha sosiedade hodi dezenvovolve nasaun ne’e.
Iha entrevista Diretór Departamento de Sociologia Profesór Januário de Correia hatete, iha tinan 2024 ida-ne’e simu ona estudante foun hamutuk limannulu resin ida (51) kompostu husi feto nain ruanulu resin tolu (23) no mane nain ruanulu resin ualu (28) no dadaun ne’e departamentu utiliza hela edifísiu Faculdade de Medicina e Ciência da Saúde (FMCS) nian ne'ebé lokaliza iha FCS-Caicoli hodi hala'o prosesu aprendizajen nian.
“Dadaun ne’e ami hahú ona aula ba estudante sira ho rekursu ne’ebé sufisiente, maibé ami nafatin hetan ajuda husi dosente sira husi departamentu seluk ho nune’e ami husu ba UNTL atu transfere dosente iha FCS tuir méritu akadémiku nian ba iha sosiolojia nomós fasilidade servisu ne’ebé sufisiente ba funsionamentu servisu nian”, dehan Diretór.
Média UNTL 
: Eugenia de Jesus
: Eugenia de JesusFoto
: Domingos Amaral
: Domingos Amaral