Universidade Nacional Timor Lorosa’e (UNTL) nia Faculdade de Turismo, Artes, Indústrias Criativas e Culturais (FTAICC) nia Dekanu Profesor Dr. Feliciano Quintas do Céu ho Vise-Primeiru Ministru, Ministru Koordenadór ba Asuntu Sosiais, Ministru Dezenvolvimentu Rural no Habitasaun Komunitaria Eng. Mariano Assanami Sabino ofisialmente lansa website fakuldade nian ba públiku.
Liuhusi entrevista iha Salaun CNE, Díli (07/06), Dekanu FTAICC Profesór Dr. Feliciano Quintas do Céu hateten objetivu husi lansamentu website ne’e atu fó sai informasaun hotu ba estudante no públiku kona-ba atividade fakuldade nian.
“Lansamentu website importante mai ami atu divulga informasaun sira ba ami-nia estudante ativu, alumni sira nomós atu hasa’e imajen fakuldade nian ba públiku, nune’e entidade sira hotu bele hatene no akompaña kona-ba ezisténsia fakuldade nian nomós nia atividade sira”, dehan Dekanu.
Dekanu mós haktuir, sei servisu hamutuk ho PRAITDI nune’e bele utiliza website ne’e ho másimu hodi publika atividade sira fakuldade nian.
Iha sorin seluk Proreitór ba Asuntu Infomatizasaun Transformasaun Dijital no Inovasaun (PRAITDI), Profesór Frederico Soares Cabral hateten, website FTAICC nia ne’e mós hanesan atividade ida husi PRAITDI nian.
“Website ne’e mós faz parte ida husi atividade PRAITDI nian, aleinde atividade SIA nomós sistema apoiu administrativu sira.
FTAICC husu ita-nia apoiu kria sira-nia website, tanba hakarak publika sira-nia informasaun nomós atu priense kritéria ida ANAAA (Agência Nacional para Avaliação e Acreditação Acadêmica) nian, nune’e ekipa tékniku sira halo ezersísiu no konsege finaliza hodi halo lansamentu”, dehan Proreitór.
Proreitor mós salienta tan, dadun ne’e website refere funsiona ona hafoin halo lansamentu no fakuldade rasik mak sei responsável hodi fó sai informasaun, PRAITDI hanesan apoiu tékniku de’it.
Lansamentu ne’e realiza iha ámbitu seremónia judisium dahuluk ba estudante FTAICC. Partisipa husi estrutura, dosente, estudante no konvidadu sira
Média UNTL 
: Domingos Amaral
: Domingos AmaralFoto 
: Laurindo da Cruz
: Laurindo da Cruz