DPCM REALIZA ESPOZISAUN NO PLERNÁRIA HODI SELEBRA LORON MUNDIAL OCEANIA

Universidade Nacional Timor Lorosa'e (UNTL) liuhusi Faculdade de Agricultura (FAGRI) nia Departamento de Pescas e Ciência Marinha (DPCM) realiza espozisaun no plenária (konferénsia) ho tema "Ocean and Costal Challanges and Opportunities" hodi selebra Loron Mundial Oceania, iha Auditóriu FECT-Hera, Díli (10/06).

Iha konferénsia ne'e Magnífiku Reitór Profesór dr. João Soares Martins, MPH, Ph.D agradese ba DPCM, tanba tinan-tinan sempre selebra loron importante ne'e.

"Agradese ba Departamento de Pescas e Ciência Marinha bele organiza eventu ida-ne'e kada tinan, World Ocean Day, ne'e importante tebes ba estudante sira, ha'u espera katak, estudante sira bele aproveita ho didiak ativu, krítiku, no aproveita didiak iha prosesu aula no prátika hodi kontribui ba dezenvolvimentu rikosoin tasi iha Timor", dehan Reitór.

Diretór DPCM nian, Profesór Abilio da Fonseca hatete, partilla informasaun ba malu, ne’e importante tebes, tau atensaun hamutuk hodi prezerva no konserva rikosoin iha tasi laran no tasi ninin sira hodi apoiu ekonomia no apoiu ema nia moris saudável.

"Ita konvida espertu sira ne'ebé mai husi kompañia no instituisaun relevante sira hodi partilla informasaun ba malu, nune'e ita bele konserva ita nia rikosoin hodi bele apoiu ekonomia nasional no bele sustenta ita-nia moris ho saudável", dehan Diretór Abilio.

Entretantu Prezidente Komisaun Organizadora, Sergiana Fernandes hatete, objetivu eventu ne'e, atu hasa'e koñesimentu estudante no sosiedade sira-nian, atu konserva tasi no kuidadu ambiente, nune'e rikosoin tasi bele buras no saudável.

"Selebra Loron Mundial Oceania nian liuhusi atividade ne'e bele fanun estudante no sosiedade nia hanoin hodi konserva tasi no kuidadu ambiente, nune'e bele fó espasu ba rikosoin tasi hanesan, ikan, lenuk, budu tasi no seluk tan bele buras no barak no moris ho saudável", dehan.

Iha sesaun konferénsia modera husi Profesór Matias Tavares, oradór mak Diretór Jerál ba Aquakultura, Pescas, Peskiza Aquatico no Manezamentu nian, Sr. Celestino da C. Barreto ho tema "Collective actions to adress issues of Marine Biodiversity and Coastal Resources, no sesaun Peace Park aprezenta husi Universitas Nusa Cendana Indonesia, Ekipa konservasaun International, Dreamers Dive Academy .