Universidade Nacional Timor Lorosa’e (UNTL) nia Faculdade de Turizmo Artes, Industrias, Creativas Culturais (FTAICC) ba dahuluk realiza Judisium ba finalista Departamento de Comercio e Turizmo na’in-haatnulu resin tolu (43) ho tema ‘’Creative, Innovative, and Adaptive, Progress Towards Sustainable Tourism Development’’ iha salaun CNE nian, Díli (7/06).
Representante Magnifiku Reitór no atuál Pro-Reitor para os Asuntos de Coperação (PRAC) Profesór Tomé Xavier Jerónimo hatete, eventu ne’e importante tebes, tanba ba dahuluk realiza judisium ba finalista FTAICC, ne’e orgullu tebes ba Timor-Leste.
‘’Ita hotu agradese ba Na’i Maromak, tanba nia bele halo ita hotu sai família boot UNTL nian, ba finalista sira tinan lima ne’e la’ós fulan lima, la’ós semana lima, ne’e tempu naruk durante imi-nia luta, imi tanis no imi buka profesór sira hodi atinje to’o faze ida-ne’e.
Susesu ida-ne’e la’ós imi mesak mak halo, ne’e kontribuisaun husi família, kondutór mikrolete sira no profesór sira, tanba sira mak pasiénsia hodi rona imi-nia halerik ohin imi bele susesu hodi sai futuru Timor nian’’, dehan PRAC.
Iha fatin hanesan Dekanu FTAICC nian Profesór Feliciano Dias Quintas do Ceu sente orgullu tebes ba eventu ne'e tanba bele sai testemuña ba finalista FTAICC nia judisium ne’ebé realiza ho tema ‘’Creative, Innovative, and Adaptive, Progress Towards Sustainable Tourism Development’’.
‘’Tema ida ne’e reflete ba vizaun FTAICC hodi promove no exelénsia formasaun iha rekursu destakadu ba kualidade ativa inovasaun no profesionalizmu iha kualidade ho forma kontinua, ha’u mós hato’o agradese ba Magnífiku Reitór no profesór sira, inan-aman no gratidaun ba estudante finalista sira, susesu nafatin hodi servisu ho profisionál’’, dehan Dekanu.
Iha fatin hanesan Vise-Primeiru Ministru, Ministru ba Asuntu Desenvolvimentu Rural S.E. Mariano Assanami Sabino hato’o apresiasaun ba esforsu tomak ne’ebé husi sivitas akadémika tomak UNTL liuliu FTAICC ne’ebé tinan hira foin mak judisium.
‘’Turizmu hanesan komponente importante ida ne’ebé mak iha planu estratéjiku dezenvolvimentu nasionál nia tama iha pilar tolu importante mak 1 Petroliu no Minerais 2 Agrikultura 3 Turizmu, ne’e mós pilar ekonómiku prioridade ba Timor-Leste, tanba ita hotu hatene agora dadauk lidera ba ekonomia mak Petroliu no minerais’’, dehan.
Partisipa husi representante Ministru Ensinu Superior, Visereitór, Proreitór Dekanu, Dosente, finalista sira, Aman-Inan no Konvidadu sira inklui Komisaun Organizadora.
Média UNTL 
: Laurindo da Cruz Gomes
: Laurindo da Cruz GomesFoto 
: Domingos Amaral/ Laurindo da Cruz Gomes
: Domingos Amaral/ Laurindo da Cruz Gomes