Universidade Nacional Timor Lorosa’e (UNTL) nia Faculdade Ciências Sociais (FCS) realiza Judisium ba dala XXX ho tema “Kada Susesu Sempre iha Dezafiu”, hodi distribui títulu akadémiku ho grau Lisensiatura no Baxarelatu ba finalista hamutuk na’in-atus rua (200), iha Salaun Delta Nova, Díli 5/06.
Reprezentante Magnífiku Reitór atual Visereitór ba Asuntu Administrasaun, Finansas no Administradór Jeral Profesór Hélio A. X. Mauquei fó parabéns ba fakuldade, tamba marka tan istória pozitiva ida, hodi fó tan titulu akadémiku ba finalista sira, ida-ne’e hatudu katak UNTL kontribui tan rekursu hodi desenvolve país ida ne’e di'ak liutan iha futuru.
“Kongratula ba finalista sira, ohin loron espesial ba imi, tanba bele konkista no konklui ona estudu, fiar katak imi ida-idak hatudu ba kualidade ne’ebé iha. Durante estudu hasoru dezafiu maibé la desizte, ho koñesimentu ne’ebé imi iha sai hanesan baze fundamental hodi kontribui ba dezenvolvimentu país ida justa, demokrátika no prósperu iha futuru”, dehan Viseireitór Hélio.
Iha fatin hanesan, Dekanu FCS Profesór Dr. Alarico da Costa Ximenes, agradese ba dosente sira-nia apoiu no orienta ona estudante sira durante perkursu akadémiku to’o finaliza estudu iha Faculdade Ciências Sociais.“Títulu akadémiku ne’ebé imi simu hanesan responsabilidade no dezafiu, espera katak ho títulu ne’ebé imi iha habelar benefísiu ne’ebé imi hetan iha fakuldade hodi kontribui ba komunidade no dezenvolvimentu nasaun nian ba futuru, hanesan kriatura ne’ebé iha poténsia buka atu dezenvolve potensia ne’ebé iha, aprende no estuda nafatin hodi sai pesoal ne’ebé kualidade”, dehan Dekanu.
Iha sorin seluk reprezenta Finalista Zelia Gouveia Leite, hanesan mellór klasifikadu husi Departamento de Comunicação Social hato’o, agradese ba dosente FCS, inan-aman ba dedikasaun, pasiénsia no atendimentu durante períodu akadémiku nian.
“Ha’u senti kontente, tanba bele realiza ona hau nian inan-aman nia hakarak, tanba ida-ne’e la’ós esforsu ha’u-nian mesak, maibé ne’e esforu husi inan-aman no dosente sira-nia dedikasaun no kolaborasaun to ami finaliza estudu”, Zelia dehan.
Finalista atus rua (200) ne’e kompostu husi, departamentu hitu (7), Departamento de Administração Pública hamutuk nain (21), Departamento de Ciência Política (24), Departamento de Comunicação Social (57), Deparatamento de Desenvolvimento Comunitário (12), Departamento de Inclução Social e Comunitária (2), Departamento de Política Públicas (25), Departamento de Relações Internacionais ( (59).
Partisipa husi Diretór Ezekutivu Fundo do Desenvolvimento Capital Humano (FDCH) Sr. Júlio Aparicio, Dekanu, Visedekanu sira, Diretór Jeral, Diretór Nasional, Xefi Departamentu, Dosente, Funsionariu, Konvidadus, Inan Aman no Estudante sira.
