Univerisdade Nacional Timor Lorosa'e (UNTL) nia Faculdade de Economia e Gestão realiza Judisium ba dala XXVI ho tema "Dezenvolvimentu Ekonomia Sustentável mai husi Kreatividade Rekursu Humanu, hanesan Paradigma ne'ebé fó Naroman ba Povu Timor-Leste". Seremónia Judisium ne'e realiza iha salaun CNE, Colmera, Díli 28 (05).
Iha diskursu Visereitór ba Asuntu Administrasaun no Finansas, Profesór Hélio A.X Mauquei hato'o parabéns ba finalista sira ho dedikasaun no responsabilidade sira idaidak bele to'o iha etapa ne'e.
"Husu ba imi hotu hanesan jerasaun foun, atu kontribui matenek ne'ebé imi iha ba dezenvolvimentu nasaun nian, nomós nafatin aproveita oportunidade ne'ebé iha hodi kontinua estudu mestradu", dehan Visereitór Hélio.
Iha diskursu Dekanu FEG nian, Profesór Filipe Mendes Perreira, hato'o parabéns ba nia finalista sira, tanba ho sira-nia didikasaun no esforsu to'o bele finaliza estudu no ba konfiansa Inan-Aman sira nian hodi oan sira hala'o estudu iha UNTL.
"Husu estudante sira atu kontinua aprende nafatin, tanba aprende hanesan valór ida ba moris. Agradese mós ba inan-aman hotu ne’ebé fó ona konfiansa ba UNTL nune’e oan sira bele aprende to’o iha faze ida ne’e", dehan Dekanu Mendes.
Iha diskursu Mellor-Klasifikadu, Jose Filipe da Silva WoLo, husi Departamento de Ciência Economia ho valór akumulativu 3,31 klasifikasaun Muito Bom, hato'o agradese ba UNTL ba espasu hodi halo estudu, ba Dosente Inan Aman no parte hotu nian tulun liuhusi prosesu ne'ebé naruk sira bele simu títulu Lisensiadu.
"Eskola mak dalan di'ak ba moris atu hetan susesu ne'e la fasil, nune'e sosiedade ho nasaun hein hela, ita mak sai solusaun ba dezenvolvimentu nasaun nian. Agradese ba UNTL ba espasu hodi halo estudu ba Dosente Inan-Aman no parte hotu nian tulun liuhusi prosesu ne'ebé naruk, ami bele simu títulu Lisensiadu husi FEG", dehan José.
Wolo mós husu ba finalista hotu atu fó kontribuisaun liuhusi matenek ba família no nasaun nune’e bele sai solusaun ba problema ne'ebé sosiedade no nasaun enfrenta.
Totál husi finalista sianulu resin haat (94) kompostu husi departamentu 3 mak hanesan, Departamento de Gestão (46) Departamento de Ciência Economia (29) no Departamento de Contabilidade (19).
Partisipa husi reprezentante Ministério Ensino Superior, Siénsia no Kultura (MESSC) Sr. Jerónimo dos Santos, Dekanu sira Visedekanu, Diretór Jeral, Diretór Nasional, Dosentes, Xefi Departamentu, Funsionariu, Konvidadus, Inan Aman, Estudante sira.
