![441867125_122167280828076902_7013280598428567647_n.jpg](/images/441867125_122167280828076902_7013280598428567647_n.jpg)
Universidade Nacional Timor Lorosa'e (UNTL) nia Magnífiku Reitór Profesór dr. João Soares Martins, MHP, Ph.D hamutuk ho Prezidente Repúblika, Dr. José Manuel Ramos Horta halo abertura ba semináriu ho tema "Oralidade Cultura e Literatura em Timor Leste" hodi selebra loron restaurasaun independesia nian ba dala XXII, iha Palácio Presidente Aitarak Laran, Díli (17/05).
Iha abertura Reitór UNTL, agradese ba estadu Timor-Leste, tanba atribui kondekorasaun ba Dr. Shepard Formam iha selebrasaun aniversáriu loron restaurasaun independesia Timor Leste nian ba dala XXII, no ondra ba UNTL hodi partisipa iha eventu sientífiku ne'e, partikularmente siénsia kona-ba oralidade kultura, literatura iha Timoroan nian.
"Agradese ba estadu Timor-Leste, tanba bele kondekora Dr. Shepard Formam no iha selebrasaun idependensia RDTL nian ba dala XXII (2002-2024). Agradese mós ba Dr. Formam, tanba bele hamutuk ho ami no ami rekoñese obra ita-boot nian kona-ba hakerek istória ne'ebé halo iha tinan 50 liubá no husi obra ne'e mak marka identidade Timoroan nian ne'ebé sustenta mós luta ba libertasaun", tenik Reitór.
![441519921_122167280888076902_88835492079432715_n.jpg](/images/441519921_122167280888076902_88835492079432715_n.jpg)
Iha fatin hanesan Prezidente Repúblika Dr. Ramos Horta hato'o parabéns ba Dr. Shepard Formam, tanba bele halo ona obra ida kona ba istória Timor-Leste nian iha tinan 50 liuba, hodi sustenta no kontribui mós luta ba ukun rasik an.
"Ohin ha’u hakarak hato'o parabéns ba Dr. Shepard, tanba ho nia obra ida kona-ba hakerek istoria Timor-Leste nian, ne'e merese atu ita rekoñese hodi fó kondekorasaun, tanba husi obra ne'e nu'udar identidade Timoroan nian, nune'e sustenta mós ba ukun rasik an ida-ne'e", dehan Prezidente Horta.
Semináriu sientífiku ne’e organiza husi Departamento de Língua Portuguesa FEAH-UNTL no koopera ho Prezidente Repúblika. Enkuantu iha sesaun semináriu oradór mak pesoa eminente antropologu, Dr. Shepard Forman, ho títulu "Auto-etnografia ida: antropologu ida iha ema Makassae nia leet". Aleinde ne’e iha diskusaun sira relevante ba “Oralidade Cultura e Literatura Em Timor Leste”.
![442386845_122167281398076902_3921403263819328020_n.jpg](/images/442386845_122167281398076902_3921403263819328020_n.jpg)
Partisipa husi Dekanu Faculdade de Direito nian, Profesor, José Tomas Alves, Decano Faculdade de Ciências Sociais profesór Dr. Alarico da Costa Xiemenes, Diretór Sentru Estudu ba Arte no Kultura, Profesór Vicente Paulino, Dosente, estudante no konvidadu sira.
Média UNTL
: Leonia de Araújo da Costa
![📝](https://static.xx.fbcdn.net/images/emoji.php/v9/tcc/1/16/1f4dd.png)
Foto
: Leonia de Araújo da Costa
![📷](https://static.xx.fbcdn.net/images/emoji.php/v9/t5d/1/16/1f4f7.png)