Universidade Nacional Timor Lorosa’e (UNTL) nia Faculdade Medicina Ciência de Saúde (FMCS), nia Dekana Profesora Lidia Gomes abertura workshop kona-ba revizaun kurríkulu Curso Nutrição e Dietética, ne’ebé organiza husi Escola Superior de Tecnologia da Saúde (ESTeS), iha Salaun INAP Comoro, Díli (17/05).
Profesora Lidia Gomes hatete, revizaun kurríkulu ne’e hanesan pasu ida ne’ebé presiza atu kompleta di’ak liután kurríkulu kursu nutrisaun no dietetica nian, tuir padraun Ajénsia Nasional Avaliasaun Akreditasaun Akadémika (ANAAA) nian.
“Agradese ba tékniku, funsionáriu no parseria sira-nia kontribuisaun no esforsu hodi mellora di’ak liután kurríkulu ba kursu Nutrisaun Dietetika tuir padraun ANAAA (Agência Nacional para Avaliação e Acreditação Acadêmica) ho kualidade no inovasaun hodi dezenvolve edukasaun saúde iha Timor-Leste”, dehan Dekana.
Iha fatin hanesan Diretór ESTeS Mestre Miguel Soares hateten, objetivu husi workshop ne’e hodi halo revizaun tuir planu ne’ebé kada tinan rua halo, maibé ho limitasaun servisu nune’e tinan ne’e bele realiza.
“Ohin ita halo workshop ba revizaun kurríkulu ida-ne’e, hodi haree rekomendasaun husi ANAAA nian, tuir kriteria kada tinan rua presiza halo revizaun hodi mellora planu kurrikulár no evolusaun ba Siénsia hodi mellora di’ak liutan kursu nutrisaun dietétika nian”, dehan Diretór Soares.
Workshop refere realiza ho apoiu másimu husi World Health Organization (WHO) Timor-Leste, Fundação Calouste Gulbenkian no Escola Superior de Tecnologia de Saúde de Lisboa.
Partisipa iha Workshop ne’e Vise-Dekanu III Mestre Acásio de Jesus, Dosente, Diretór, funsionariu sira husi Ministériu Saúde, ekipa Tékniku ESTes, estrutura Alumni Nutrisaun Dietetica no estudante sira.
Média UNTL 
: Eugenia de Jesus
: Eugenia de JesusFoto 
: Domingos Amaral
: Domingos Amaral