PROFESÓR ALARICO ELEITU HO VOTU 34 BA DEKANU FCS 2024-2028

Universidade Nacional Timor Lorosa’e (UNTL), nia Faculdade de Ciências Sociais (FCS) nia, Profesór Alarico da Costa Ximenes eleitu ba dekanu FCS ba períodu tinan 2024-2028 ho votu (34) liuhusi aprezentasaun programa no eleisaun, iha Kampus Kaikoli FCS nian, Díli (13/02).

 

Iha diskursu Magnifíku Reitór apela ba dekanu foun no estrutura Faculdade de Ciências Sociais atu halo preparasaun di’ak kada kursu sira ne’ebé atu halo avaliasaun husi ANAAA, nune’e bele hetan kualifikasaun ne’ebé di’ak iha prosesu avaliasaun.

 

“Pontu importante mak fakuldade tenki iha preparasaun di’ak ba kursu sira tuir kritéria ANAAA (Agência Nacional para Avaliação e Acreditação Académica ) nian. Tanba fakuldade iha profesór doutoradu barak ho poténsia boot no husu ba dekanu eleitu ho estrutura atu prepara di’ak ba iha avaliasaun nune’e bele hatudu kualifikasaun ne’ebé di’ak”, tenik Reitór.

 

 

 

Dekanu eleitu Profesór, Alarico da Costa Ximenes hatete, durante nia mandatu iha servisu barak sei halo no sei fahe ba iha tempu kurtu prazu, médiu no longu prazu liu-liu kona-ba preparasaun ba re-akreditasaun husi ANAAA ba departamentu tolu iha FCS.

 

“Ita iha servisu barak mak sei halo no servisu hirak ne’e ita fahe ba iha kurtu prazu, mediu no longu prazu, fakuldade nia dapartamentu sira sei hetan reakreditasaun husi ANAAA ,tanba ne’e ita tenki halo preparasaun no ajusta mós kurríkulu hodi hadia ambiente iha kampus laran nune’e estudante sira bele tuir aula ho di’ak.

 

Fakuldade ne’e tenke sai sentre exelénsia liga ba pilár ensinu, peskiza no dedikasaun komunitária, maibé ne’e servisu ida presiza ita-nia servisu ekipa tantu dosente, funsionáriu no estudante rasik tanba estrutura fakuldade no departamentu nian jere de’it iha prosesu administrativu nian”, dehan Profesór Alarico.

 

 

 

 

 

 

 

 

 

 

Iha eleisaun ne’e kompete husi kanditatu na’in tolu, Profesór Dr. Alarico da C. Ximenes, ho votus (34), Profesór Dr. Martinho Pereira votus (7) no Profesór Dr. Zacarias F. Da Costa ho votus (11), total votante husi profesór permanente na’in lima nulu-resin rua (52).

 

#TimorLeste #UNTL # FCS # 14 Fevereiru 2024

 

Média UNTL : Domingos Amaral

Foto : Denilson A. Barros, Agostinho da Cruz