Universidade Nacional Timor Lorosa’e (UNTL) nia Diretora Instituto Nacional de Linguística (INL) Profesora Rosa da Costa Tilman, iha Kampus Liceu, Díli (8/02), hatete Planu Prioridade INL nian ba 2024 mak (1) formasaun, (2) semináriu no (3) imprimi livru disionáriu ofisial Tetun .
“Iha tinan ida-ne’e INL sei foku ba formasaun iha Munisípiu Viqueque kona-ba lian Tetun tuir Padraun Nasional no halo mós semaináriu ba profesór/a no funsionáriu administrativu oinsá hakerek karta ho Tetun tuir padraun nasional no sei imprimi mós livru ne’ebé ami prepara hodi sai hanesan Matadalan Disionáriu Ofisial Tetun”, dehan.
Profesora Rosa hatutan tan katak, Instituto Nacional de Linguística sei halo mós eventu ho tema semana Língua Tetun hodi selebra loron ezisténsia INL nian.
“Ami sei loke eventu ho tema semana Língua Tetun no iha mós feira livru ba diresaun no fakuldade sira hodi selebra aniversáriu loron ezisténsia INL nian. Sei halo mos semináriu ba profesór/a no funsionáriu administrativu hodi dezenvolve Tetun nu’udar língua ho Padraun Nasionál Timor-Leste nian” hatutan.
