Universidade Nacional Timor Lorosa'e (UNTL), nia Magnífiku Reitór Prof. dr. João Soares Martins, MPH,Ph.D, halo lansamentu ofisiál ba semináriu kursu Mestradu iha área Edukasaun nian, iha Auditóriu Arkivu Museu Rezisténsia Timorense Díli (25/01).
Iha abertura, Reitór hatete, lansamentu ne'e ba kursu Mestradu iha UNTL, atu hasa'e mós kualidade edukasaun iha Timor-Leste liuhusi estudante Mestradu sira ne'e. Totál estudante hamutuk tolu nulu resin tolu (33) ba kursu nee, espera katak husi totál estudante ne'e sei termina hotu sira-nia estudu.
"Parabéns ba estudante Mestradu iha área edukasaun nian iha UNTL, ne'ebé hahú tiha ona aula iha semestre dahuluk iha tinan 2022, loloos ita halo lansamentu antes aula hahú, maibé la konsege tanba tempu. Ohin ita foin halo lansamentu no kursu ne'e ho objetivu atu hasa'e kualidade edukasaun iha Timor Leste, kursu refere estudante hamutuk 33, espera katak husi totál ne'e laiha ida mak falla iha dalan klaran" tenik Reitór.
Atividade ne'e organiza husi, Programa Pós Graduasaun no Peskiza-UNTL (PPGP), Sentru Estudu Arte no Kultura (CECA), Faculdade de Educação Artes e Humanidades (FEAH-UNTL) no suporta husi Parseiru Nasional no Internasional CAPES (A Coordenação de Aperfeiçoamento de Pessoal de Nível Superior).
Partisipa iha lansamentu ne'e, Visereitór, Proreitór, Diretór Nasional, Dekanu, Dosente ba Kursu Mestradu sira no estudante sira.
#TimorLeste #UNTL #PPGP #FEAH 26 Janeiru 2024
Média UNTL 📝: Leonia de A. da Costa
Foto 📷: Eugenia de Jesus