Universidade Nacional Timor Lorosa’e (UNTL) nia Magnífiku Reitór Profesór dr. João Soares Martins,MPH.Ph.D akompaña husi reprezentante Prezidente Comissão Função Pública (CFP) nia Komisáriu José Telo Soares Cristovão fó pose ba funsionáriu na’in 40 ba Kargu Xefia no Xefe Sesaun hodi kompleta estrutura Mikro-UNTL, ho mandatu tinan haat (2024-2028).
“Husu ba imi hatudu responsabilidade ne’ebé aas, nomós hatudu ita-nia ambisaun atu halo mudansa, tanba kargu xefia ne’e ema barak mak konkore, la hetan, maibé ita boot sira mak konsege susesu ne’e di’ak tebes ba UNTL.
Iha vaga tenki iha rekezitu ne’ebé prepara no estuda para responde pergunta, entaun motivasaun ne’e tenki kontinua la’ós de’it atu konkore maibé aumenta tan responsabilidade hodi ezerse duni hodi hala’o knaar ho di’ak hodi kontrola servisu tuir disiplina’’, dehan Magnífiku Reitór, liuhusi diskursu iha Auditóriu FECT nian, Hera, Díli (25/01).
Iha fatin hanesan Komisariu CFP nian Sr. José Telo Soares Cristovão hato’o agradese ba Prezidente Juri, tanba liuhusi prosesu naruk bele hetan emposadu/a sira liuhusi prosesu méritu atu ezerse kargu ida.
‘’Ita haree iha ne’e ita dehan tranzisaun, tanba joven sira komesa okupa iha kargu barak ne’e di’ak tebes. Ohin ita boot sira asina hodi toma responsabilidade, guarda segredu no juramentu ne’ebé halo labele hotu iha ohin, tanba selesaun méritu ne’e ba tinan 4 iha UNTL, ita boot sira iha responsabilidade ba kualidade edukasaun, tanba imi mak sai autór atu asegura prosesu administrativa iha universidade’’, dehan José Telo.
Iha fatin hanesan Sra. Zelia Soares de Carvalho emposada ba Xefe Departamento de Logística, sente orgullu tebes, tanba iha períodu dala rua ona nafatin asume ona kargu iha departamentu refere no agradese ba Maromak liuhusi UNTL no CFP bele fo fiar nafatin hodi hala’o knaar ne’e.
‘’Iha kargu ida-ne’e ha’u iha responsabilidade hodi hala’o ha’u-nia knaar tomak ho di’ak liután iha períodu ne'e, nu’udar feto ida ha’u mós hakarak kontribui ba prosesu dezenvolvimentu no konstrusaun estadu ida-ne’e, atravez husi UNTL’’, dehan emposada.
Seremónia ne'e partisipa husi Visereitór, Proreitór, Diretor Jeral, Diretor Nasional, Inspetora CFP, Dosente, Funsionáriu, Asistente Tékniku inklui família husi emposadu/a sira.
#TimorLeste #UNTL #CFP 25 Janeiru 2024
Média UNTL 📝: Laurindo da Cruz Gomes
Foto 📷: Leonia da Costa/ Altur Ramos/ Domingos Amaral (estajiáriu)