Universidade Nacional Timor Lorosa’e (UNTL), nia Diretora Poliklínika Universitária (PU), Profesora dra. Teresa António Madeira Soares, iha Kampus Sentrál UNTL nian, Díli (10/01), informa katak poliklínika dadaun ne’e bele fó ona atendimentu ba sivitas akadémika hamutuk atus rua hitu 207 ne’ebé halo tratamentu saúde.
Iha entrevista Diretora Poliklínika Universitária hateten, dezde lansamentu no dadaun ne’e poliklínika fó ona atendimentu ba pasiente hahú iha tinan 2023 hamutuk (207) no inísiu tinan 2024 ne’e, hamutuk (10) konsulta refere gratuita ba sivitas akadémika (Dosente, Funsionáriu no Estudante) inkliu família.
“Dadaun ne’e ita-nia poliklínika fó atendimentu ba sivitas akadémika no familia sira, ne’ebé ita hetan ona lisensa husi Ministériu Saúde hodi halo tratamentu ho nivel primariu tuir fasilidade ne’ebé ita iha hanesan farmasia, laboratóriun, konsultóriu, armajen tau aimoruk, eskritóriu no fatin administarasaun”, dehan Profesora Teresa.
Poliklínika Universitária ne'e lokaliza iha Kampus Sentrál UNTL nian, Díli no atendimentu ba sivitas akadémika gratuita tuir área ne’ebé hetan ona lisensa, durante oras servisu nian.
#TimorLeste #UNTL #PoliklínikaUniversitaria 10 Janeiru 2024
Média UNTL 📝: Eugenia de Jesus Guterres
Foto 📷: Agostinho da Cruz