Universidade Nacional Timor Lorosa’e (UNTL) nia Magnífiku Reitór Prof. dr. João Soares Martins MPH, Ph.D ho nia estrutura akompaña husi Ministru Ensinu Superior Siénsia no Kultura (MESC) S.E. José H. da Costa P. Jerónimo halo audiénsia ho Komisaun G Parlamentu Nasionál ne’ebé trata Asuntu Edukasaun, Juventude, Kultura no Sidadania hodi diskute Orsamentu Jeral Estado (OJE) 2024, iha sala reuniaun Komisaun G, Díli (05/12).
Iha entrevista Reitór UNTL hateten OJE 2024 nian ne’ebé aloka ba UNTL ho montante millaun 17 kobre prioridade ba Tripla Misaun universidade nian hanesan Ensinu, Peskiza no Servisu Komunitária.
“OJE 2024 nian ne’ebé aloka mai UNTL hamutuk millaun 17,281,336 ne’ebé fahe ba kategoria 5 mak hanesan Saláriu no Vensimentu, Bens Serbisu, Kapital Minór, Kapital Dezenvolvimentu, Transferénsia Públika. Nune’e, tinan oin sei fó prioridade nafatin Tripla Misaun universidade nian hanesan, Ensinu, Peskiza no Servisu Komunitaria” hateten Reitór.
Reitór mós hatutan preokupasaun UNTL nian mak infraestrutra ne’ebé limitadu tebes maibé dadaun ne’e konstrusaun ba edifísiu balun la’o hela no sei konstrui tan edifísiu foun balun iha tinan ne’e.
“Preokupasaun agora iha UNTL mak infraestrutura, maibé agradese dadaun ne’e edifisísu balun iha hela faze konstrusaun hanesan Fakuldade Agrikultura nian, espera katak tinan ida ne’e bele remata, nune’e mós edifísiu foun ba Instituto Nacional de Linguística (INL) iha hela prosesu tenderizasaun” hatutan Reitór.
Iha tinan 2024 UNTL propoin tan edifísiu foun laboratóriu integradu hamutuk ho Fakuldade Siénsia Ezata nian iha Hera.
Partisipa iha Audiénsia ne’e Visereitór ba Asuntu Administrasaun Finansas no Administrador Jerál Profesór Helio A. X. Mauquei, Visereitora ba Asuntu Estudantís Prof. Dra. Lígia Tomás Correia, Proreitór ba Asuntu Planeamentu Monitorizasaun no Avaliasaun, Profesór Dr. José Nelson Salsinha, Diretór Nasional Planu Finansas, Sr. Egídio do Santos Filipe no membru Komisaun G Parlamentu Nasional.
#TimorLeste #UNTL #MESSC #KomisaunGPN 5 Dezembru 2023
Média UNTL 📝: Agostinho da Cruz
Foto 📷: Agostinho da Cruz