Universidade Nacional Timor Lorosa’e (UNTL), liuhusi Faculdade de Ciências Sosiais (FCS), Departamentu Inkluzaun Komunitária Sosial nia estudante Gilberta do Santos Pereira, estudante ida maské ho kondisaun difisiente matan, sai orgullu ba família tanba gradua ona ho títulu Akadémiku Baxarelatu, iha serimónia graduasaun ba dala XXIX, ne’ebé realiza iha Auditóriu FECT Hera-Díli (23/11).
Iha entrevista graduanda Gilberta dos Santos Pereira sente kontente tebes, tanba maski ho kondisaun difisiente matan, maibé bele ultrapasa iha prosesu hotu hodi hetan graduasaun.
“Sente orgullu mezmu ho kondisaun difisiénsia matan, maibé ha’u bele ultrapasa iha etapa sira hodi hetan ha’u-nia nível edukasaun baxarelatu husi Departamentu Inkluzaun Komunitária Sosial. Ha’u husu mós ba maluk difisiensia sira hotu atu labele lakon vontade, mesmu ho limitasaun maibé la sai obstákulu atu luta hodi hetan susesu,” nia informa.
Graduandu ne’e mós agradese ba UNTL espesifikamente FCS no nia departamentu rasik ne’ebé fó ona oportunidade ba sira ho kondisaun difisiensia hodi hala’o estudu. Nia agradese mós ba família no parte hotu ne’ebé fó ona apoiu ba nia susesu.
#TimorLeste #UNTL #FCS 23 Novembru 2023
Média UNTL 📝: Abrão do Rosario Soares (estajiáriu)
Foto 📷: Artur Ramos, Octaviana Isidoro de Sá Benevides (estajiáriu)