Universidade Nacional Timor Lorosa'e (UNTL), nia Magnífiku Reitór Profesór dr. João Soares Martins, MPH, Ph.D, hamutuk ho Reitór Universitas Nusa Cendana (Kupang), Profesór Dr. Maxs U. E. Sanam, halo abertura ba semináriu ho tema" ANIMAL HEALTH IN TIMOR ISLAND" iha Auditóriu (FECT) Hera UNTL, Díli (15/09).
Magnífiku Reitór agradese ba Reitór Universitas Nusa Cendana, Profesór Maxs, ne'ebé fahe ona esperiénsia ba estudante no profesór sira nune'e bele haklean liután siénsia iha Departamento de Saúde Animal, Faculdade de Agricultura nian.
"Agradese ba Profesór Maxs ne'ebé fahe ona esperiénsia no nafatin konvida Reitór atu kontinua nafatin mai halo semináriu, nomós agradese ba Dekanu FAGRI ne'ebé halo kolaborasaun ho UNDANA hodi realiza semináriu ne'e", dehan Reitór.
Iha sorin seluk Reitór Universitas Nusa Cendana (UNDANA), Profesór Dr. Maxs U. E. Sanam, hatete semináriu refere hala'o tanba kolaborasaun entre UNTL ho UNDANA, liuhusi akadémika no haree liu ba Departamentu Saúde Animal nian.
"Semináriu ne'e hala'o tanba iha kolaborasaun entre UNTL ho UNDANA, nune'e hanesan oportunidade di'ak atu fahe esperiénsia kona-ba saúde animal nian iha Nusa Tenggara Timur (NTT) ba estudante sira hodi hatene liután siénsia ne'ebé iha", dehan Reitór UNDANA.
Partisipa iha semináriu ne'e, Visereitór, Proreitór, Dekanu, Vise-Dekanu, Dosente Funsionáriu, ekipa husi UNDANA no estudante sira.
#TimorLeste #UNTL #UNDANA #FAGRI 15 Setembru 2023
Média UNTL 📝: Denilson Amandio Barros.
Foto 📷: João Bosco Alves