#TimorLeste #UNTL #CECA #COVID19 COVID19 26 Abríl 2022
Universidade Nacional Timor Lorosa’e (UNTL), nia Sentru ba Estudu Arte no Kultura (CECA) loke kompetisaun akadémika ho modalidade lima (5), Dansa Kultural, UNTL Star, Musika Kormetan, Koru inklui UNTL Golden Memory, ho objetivu atu anima no promove talentu iha universidade nasionál. 
“Ohin sesaun fahe informasaun ba Fakuldade sira kona-ba atividade kompetisaun CECA nian, ne’ebé atu hala’o iha fulan Maiu to’o Jullu, nune’e bele promove estudante no funsionáriu sira-nia kapasidade iha artístika, tanba ne’e, mak lansa konvite ba Fakuldade sira, hodi bele rejistu iha CECA nian”, dehan Diretór CECA, Profesór Doutór Vicente Paulino, iha Auditóriu Liceu UNTL nian, (25/04)
Diretór CECA nian, hatete data rejistrasaun sei hahú husi 28 Abril to’o 10 Maiu, no nia finalidade iha fulan Jullu 2022.
“Enkuantu ba kompetisaun UNTL Star, data laiha fiksu, maibé CECA mak iha ajenda rasik hodi tun diretuba kada Fakuldade hodi halo audisaun direta ba estudante sira ne’ebé hakarak partisipa iha kompetisaun ne’e rasik”, tenik.
Partisipa iha sesaun diseminsaun ne’e, husi Visedekanu Asuntu Estudantís sira husi Fakuldade idaidak, inklui pesoál tékniku sira.
Média UNTL 📝 : Altur Ramos
Foto 📷 : Avelino da C. Bobo, Pio Belo