𝗞𝗼𝗺𝘂𝗻𝗶𝗸𝗮𝗱𝘂 𝗜𝗺𝗽𝗿𝗲𝗻𝘀𝗮
𝟭𝟰 𝗔𝗯𝗿𝗶́𝗹 𝟮𝟬𝟮𝟮
Universidade Nacional Timor Lorosa’e (UNTL) respeita nia profesór ida-ida, nia funsionáriu administrativu ida-ida, nia estudante ida-ida nia sentidu-de-votu no lakohi influensia ema ida atu vota ba kandidatu ne’ebé de’it. UNTL hakarak de’it defende nia an iha Estadu no Sosiedade tomak nia oin.
UNTL haksolok tebe-tebes tanba UNTL nia naran temi iha Debate Prezidensiál 2022 nian, maibé UNTL lamenta tebe-tebes ho liafuan ne’ebé Kandidatu Prezidente Repúblika Dr. José Ramos-Horta hasai iha Debate Prezidensiál ne’ebé realiza iha loron 13 Abríl 2022, hodi hatún imajen UNTL nian hodi minimiza nia kualidade. Dala hira kedas Kandidatu Prezidente Repúblika Dr. José Ramos-Horta repete liafuan ne’ebé atu dezakredita UNTL nia imajen husi de’it nia impresaun rasik. 
UNTL estabelesidu husi tinan 2000, nu’udar Instituisaun Estadu nian. Nia sujeita ba avaliasaun fila-fila husi instituisaun akreditasaun no avaliasaun independente ANAAA, membru júri sira kompostu husi avaliadór nasionál no internasionál, ne’ebé hetan predikadu akreditasaun A. Ida ne’e rekuñese duni katak UNTL kontribui ona durante tinan ruanulu-resin ba formasaun rekursus-umanus ne’ebé kontribui ba funsionamentu Estadu no Nasaun Timor-Leste no mós prepara rekursus-umanus ba jerasaun foun sira tuir mai, nafatin ba nafatin.
UNTL apela atu kandidatu ne’ebé povu hili atu sai Prezidente Repúblika atu bele apoiu nafatin UNTL, atu Instituisaun ne’e bele halo nia kna’ar diak liu tan ba rai Timor-Leste nia futuru.