#TimorLeste #UNTL #FEAH #COVID19 #COVID19TL 12 Abril 2022
Universidade Nacional Timor-Lorosa’e (UNTL), liuhusi Fakuldade Edukasaun, Arte no Humanidade (FEAH), nia estudante foun, na’in atus sia, sianulu resin ualu (998) partisipa iha orientasaun akadémika entre loron 7-9 Abril 2022, ho tema “Construir Sinergias Para Alcançar Boas Prestações Académicas Rumo a Um Campus de Excelência”, iha Liceu UNTL (08-04).
Vise-Dekanu ba Asuntu Akadémika FEAH nian, Profesór Elvis Fernandes Brites da Cruz M.Ed, hanesan Oradór I, ne’ebé aprezenta kona-ba kurríkulu hateten ba partisipante sira katak, atu atinje susesu kurríkulu importante tebes, atu guia estudante sira hodi aproveita ho di’ak iha ensinu universidade nian.
“Ohin imi mai iha ne’e, ho objetivu ida atu aprende iha Universidade Nasionál liuliu FEAH, iha idaidak nia área estudu, tanba ne’e, imi fila tenki lori mós ho bukae ida husi UNTL hodi ba implementa iha sosiedade”,tenik Vise-Dekanu.
Iha fatin hanesan, Eis Sekretáriu Estadu Juventude no Desportu, Sr. Leovigildo da Costa Hornai, nu’udar Oradór II hatete, papel foinsa’e ba dezenvolvimentu edukasaun inkluzivu iha Timor-Leste importante tebes ba jerasaun foun sira.
“Siénsia ne’e, Transversál, Umanidade, Globalizasaun no vida humana tan ne’e, Governu no entididade sira hotu iha Timor-Leste sempre luta hodi tau atensaun ba eduksaun ida ne’ebé inkluzivu ba sidadun sira”, tenik Prezidenti Alumni UNTL ne’e. 
Oradór daruak ne’e hatutan katak, edukasaun inkluzivu ne’e oportunidade ba hanorin na’in sira, liuliu estudante sira mak hili ona hodi estuda iha FEAH ne’ebé prepara ba futuru bele hetan koñesimentu, inspirasaun, kredibilidade, no inovasaun. 
Média UNTL 📝 : Altur Ramos
Foto 📷 : Altur Ramos