#TimorLeste #UNTL #ANAAA #COVID19 #COVID19TL 06 Abril 2022
Universidade Nacional Timor Lorosa'e (UNTL) nia Magnífiku Reitór, Profesór dr. João Soares Martins, MPH, Ph.D, abertura semináriu diseminasaun informasaun kona-ba avaliasaun programátika nian, hodi prepara ba avaliasaun ne’ebé sei hala’o husi Ajénsia Nasionál ba Avaliasaun no Akreditasaun Akadémika (ANAAA) iha tinan 2022 nian. 
Iha abertura ne'ebé hala’o iha Sala-Enkontru Fakuldade Agrikultura (FAGRI) nian, (06/04), Magnífiku Reitór agradese ba Diretór Ezekutivu (ANAAA) Sr. Edmundo Viegas, Ph.D. ne'ebé ho hanoin di'ak no fó atensaun makas tebes ba instituisaun ensinu superior nian iha teritóriu tomak inklui UNTL.
"Agradese ba hotu-hotu liuliu ba formadu sira atu hetan esperiénsia ho diak, nomós formasaun ne'e importante tebes atu prepara ita hodi hetan valór di'ak liu iha avaliasaun atu prepara ba avaliasaun tuir mai”, tenik Reitór.
Iha fatin hanesan, Diretór Ezekutivu ANAAA nian, Sr. Edmundo Viegas, Ph.D, hateten semináriu refere nu’udar inisiativa di'ak universidade atu fó asisténsia ba diretór sira, nune’e, prepara atu tuir avaliasaun akreditasaun ba programátika.
"Semináriu ne'e tékniku husi ANAAA nian mai fahe informasaun no atu prepara diretór kursu no dosente sira, liuliu fasilita maneira hodi priense no fornese informasaun tuir indikadór sira ANAAA nian”, tenik Diretór ANAAA.
Iha tinan 2022, universidade prepara kursu hitu (7) ba avaliasaun hanesan, Fakuldade Siénsia Exata (FSE), Departamentu Siénsia Exata; Fakuldade Enjeñaria, Siénsia no Teknolojia (FEST), Departamentu Enjeñaria Informátika no Departamentu Enjeñaria Sívil; Fakuldade Edukasaun, Arte Humanidade (FEAH), Departamentu Ensinu Língua Portugueza; Fakuldade Ekonomia no Jestaun (FEG), Departamentu Jestaun, Departamentu Siénsia Ekonomia no Departamentu Kontabilidade.
Partisipa husi Visereitór Asuntu Akadémiku no Garantia Kualidade, Profesór Doutór Samuel Venâncio de Sousa Freitas, Visereitór Asuntu Pos-Graduasaun no Peskiza, Profesór Doutór Afonso de Almeida, Diretór Departamentu, Dosente no Funsionáriu sira.
Média UNTL 📝 : Denilson Amandio Barros
Foto 📷 : Julito Afonso (estajiáriu)