T#TimorLeste #UNTL #MinistériodaSaúde #COVID19 #COVID19TL 01 Abril 2022
Universidade Nacional Timor Lorosa’e (UNTL) nia Magnífiku Reitór, Profesór dr. João Soares Martins, MPH, Ph.D, abertura vasina ba datoluk nian ho Booster/Pfizer ba Sívitas Akadémika tomak iha kampus Sentral UNTL nian, Díli (31/03).
Magnífiku Reitór UNTL agradese ba Ministeriu Saúde tanba bele kontinua fo vasinasaun Booster/Pfizer ba Sívitas Akadémika sira iha UNTL atu ajuda komunidade akadémika hodi proteje an husi Covid-19.
“Vasina ne’e importante teb-tebes, ne’e duni profesores, estudante, funsionáriu sira, ita mak sai exemplu hamutuk ho liña frente sira, vasina uluk atu nune’e ita-nia komunidade bele la’o tuir liuliu partisipa iha vasina’’, tenik Magnífiku Reitór.
Reitór mós hatutan tan katak moris saudável mak tenki moris ijéniku no promove saúde públika iha populasaun no bens-estar ba estudante, funsionáriu no dosente hotu. 
Iha fatin hanesan, Diretora Jeral Prestasaun ba Servisu dra. Odete Viegas hateten, hanesan ema hotu hatene ona situasaun pandemia global bolu atensaun ba ema hotu inklui Timor-Leste atu prevene an.
‘’Ita atravesa pandemia global, ne’ebé Timor-Leste sai mós vítima ba iha pandemia ida ne’e, ita haree kazu Covid-19 hahú dezde 2020 to’o ohin loron kazu aumenta no gradualmente mós kazu komesa diminui’’, Dehan dra. Odete.
Diretora mós hatutan tan, medidas preventiva ne’ebé uza ne’e mak nafatin uza maskara, fase liman no mós distansiamentu sosiál hanesan medida-preventiva inklui vasinasaun.
Vasina ne’e organiza husi Poliklínica Universitária ho Ministériu Saúde, sei hala’o durante loron rua 31 Marsu to’o 1 Abril. Iha okasiaun ne’e entrega mós sertifikadu apresiasaun ba estudante Fakuldade Medisina no Siénsia Saúde (FMCS) sira ne’ebé antes ne’e ajuda fó vasina ba Sívitas Akadémika UNTL iha iha tinan kotuk.
Partisipa iha abertura ne’e Visereitór, Proreitór, Diretór-Jeral, Diretór Sentru, Pessoál saúde sira, funsionáriu administrativu sira, dosente, estudante no konvidadu sira.
Média UNTL 📝 : Laurindo da Cruz Gomes
Foto 📷 : Mateus Goncalves