#Timorleste #UNTL #FMCS #HospitalRegionaldeBaucau #COVID19 #COVID19 29 Marsu 2022
Universidade Nacional Timor Lorosa’e (UNTL) nia Magnífiku Reitór, Profesór dr. João Soares Martins, MPH, Ph.D, halo abertura Estájiu Klíniku I, II no III, ba estajiáriu na’in 66 husi Departamento de Farmácia, Departamento de Nutrição e Dietética no Departamento de Ciências Biodimedicas Laboratoriais, iha Hospital Regional Eduardo Ximenes, Baucau (28/03).
“Ne’e tempu ida di’ak tebes atu imi bele prátika fila fali teoria ne’ebé estuda iha universidade, durante ne’e, agora imi bele aplika tuir situasaun ideal ne’ebé iha atu buka aprende tan liuhusi prátika direta ho pasiente sira”, tenik Magnífiku Reitór.
Reitór mós husu ba estajiáriu sira hatudu idaidak nia sakrifisiu hodi atualiza ho kondisaun ne’ebé mínimu maibé tenta atu ajuda pasiente sira ne’ebé presiza apoiu.
“Iha tempu ida ne’e, agradese ba Diretór Ezekutivu Hospital Regional Eduardo Ximenes Baucau (HREXB) ne’ebé oferese ona fatin no oportunidade ba estudante sira hodi hala’o prátika atu prienxe kritériu universidade nian. 
Iha fatin hanesan, Dekanu Fakuldade Medisina no Siénsia Saúde (FMCS) Profesór Deonizio Ximenes hatete estájiu ne’ebé hala’o Fakuldade ho esperansa katak sira bele aproveita didiak oportunidade ne’e hodi aprende di’ak liután.
“Objetivu husi estájiu ne’e atu bele partilla siénsia ne’ebé durante ne’e sira hetan iha banku estudu no bele prepara mós ba aban bainrua sira remata kursu ne’e sira bele iha ona esperiensia ba servisu”, tenik Dekanu.
Iha fatin hanesan, Diretór Ezekutivu HREXB nian, Dr. Evangelino Roque Soares, hato’o bemvindu ba estudante sira no agradese ba Universidade tanba bele hili Hospital ne’e sai fatin pratika ba sira-nia estudu.
‘’Esperiénsia ita hetan hahu kompostu teoria no aplika hodi hetan resultadu liuhusi prátika hodi desenvolve di’ak liután ba imi-nia futuru liuliu fó atendimentu ba pasiente sira ne’ebé presiza asisténsia”, Dehan.
Estudante na’in 66 ne’e, kursu Farmásia hamutuk (27), no kursu Nutrisaun no Dietétika (19) no Siénsia Biomédika no Laboratoriál (20).
Partisipa husi Visereitora ba Asuntu Estudantís (VRAE), Profesora Eng.ª Lígia Tomás Correia, M.Sc, no Diretór-Jerál Servisu Apoiu Reitoria (DGSAR), Profesór Jacinto Hermenegildo Soares Belo, orientadór sira, estudante, pessoál saúde sira, inklui konvidadu sira.
Média UNTL 📝 : Laurindo da Cruz Gomes
Foto 📷 : Laurindo Da Cruz Gomes