#TimorLeste #UNTL #FCS-DCS #KNTLU #COVID19 #COVID19TL 23 fevereiru 2022
Universidade Nacional Timor Lorosa'e(UNTL) nia Magnífiku Reitór, Profesór dr. João Soares Martins MPH, Ph.D, ho Komisaun Nasionál Timor-Leste, ensera formasaun Arte Narativa iha Era Dijitál, organiza husi Departamentu Komunikasaun Sosiál, Fakuldade Siénsia Sosiál (DCS-FCS), no apoiu husi Komisaun Nasional Timor-Leste ba UNESCO (KNTLU), iha salaun Katedrál, Díli (22/02).
Iha enseramentu ne'e, Magnífiku Reitór hateten formasaun refere importante ba estudante kursu Komunikasaun Sosiál nian, hodi aumenta tan estudante sira-nia koñesimentu ba kualidade ensinu no kualidade kooperasaun UNTL no KNTLU nune'e kursu sai akreditadu liután.
"Papel komunikasaun sosiál ne'e importante tebes, liuliu ba kursu Komunikasaun Sosiál atu hato'o informasaun ho domin no dame, nune'e bele kria sosiedade kreativu nomós komunikasaun di'ak ba sosiedade", tenik Reitór.
Iha fatin hanesan, Sekretáriu Ezekutivu KNTLU, Sr. Francisco Barreto, hateten, formasaun hakerek artigu ne'e hetan apoiu husi UNESCO Paris ho objetivu atu mellora koñesimentu estudante sira ne'ebé iha area komunikasaun sosiál.
"Ohin ita ensera ona formasaun durante fulan rua, no formasaun ne'e hodi ajuda estudante sira hakerek artikel ida ne'ebé di'ak no loos, tanba ne’e ba oin sei servisu hamutuk no kooperasaun nafatin nomós ba Universidade", tenik Sr. Francisco.
Iha fatin hanesan, Diretór Departamentu DCS, Profesór Marcelino X. Magno M.A, hateten, formasaun ne'e hala'o desde tinan kotuk koopera ho Komisaun Nasional Timor-Leste ba Unesco hodi fó formasaun ba estudante sira oinsa hakerek artigu ho kriativu.
"Deseju ba estudante sira ne'ebé hetan ona formasaun ne'e atu bele kontinua nafatin ba oin nune'e bele mellora nafatin Departamentu nomós universidade" tenik Deiretór.
Iha enseramentu ne'e, lansa mós website UNESCO nian ba DCS inklui fahe prémiu ba estudante manan na’in sira ne'ebé hakerek artigu kriativu nomós halo abertura ano letivu 2022 ba Departamentu Komunikasaun Sosiál.
Partisipa husi Dekanu Fakuldade Siénsia Sosiál, Profesór Camilo Ximenes Almeida, Diretór Ezekutivu Teknolojia Informasaun no komunikasaun (TIC,IP) Sr.Roberto Caetano de Sousa Vicente, Reprezentante husi Ministériu Ensinu Superiór, Siénsia no Kultura, Sr. Valentim Ximenes, Ph.D, dosente no estudante sira.
Média UNTL 📝 : Denilson Amandio Barros
Foto 📷 : Laurindo da Cruz Gomes