#TimorLeste #UNTL #FCE #COVID19 #COVID19TL 23 Fevereiru 2022
Universidade Nacional Timor Lorosa’e (UNTL) nia Magnífiku Reitór, Profesór dr. João Soares Martins MPH, Ph.D, lansa Website Fakuldade Siénsia Ezata nian (https://fce.untl.edu.tl), no halo abertura ba “Seminário Científico: Os Estudantes Pesquisadores da UNTL” iha ámbitu komemorasaun ezisténsia FCE ba dala VII, iha salaun Ian Martin, Balide Díli (23/02).
Magnífiku Reitór iha abertura hateten, ezisténsia Fakuldade Siénsia Ezata ne’e importante tanba promove Siénsia Ezata Puru iha Timor-Leste.
“Fakuldade Siénsia Ezata nia ezisténsia ba dala VII iha UNTL no Timor-Leste, tanba ne’e ita bo’ot sira nia ezisténsia ne’e importante hatudu diferensa tanba promove siénsia puru iha País ida ne’e, no únika kursu iha Timor-Leste”, tenik Reitór.
Reitór mos hato’o nia dezeju ba Fakuldade hodi kria ona website Fakuldade nian hodi promove Fakuldade liuhusi website nune’e sosiedade bele koñese diak liutan.
Iha fatin hanesan, Dekanu FCE, Profesór Romualdo Lopes da Cruz, iha nia diskursu hateten, ezisténsia FCE durante ultrapasa desafiu oioin maibé nafatin iha kompromisiu atu promove Fakuldade ne’e durante nia mandatu.
“Kongratula FCE ba tinan 7 ezisténsia iha UNTL ho desafiu oioin ita ultrapasa, hanesan Dekanu ha’u-nia kompromisu hodi promove no lori susesu Fakuldade, marka inísiu ida mak website FCE nian, nune’e bele lori asesu informasaun relasiona atividade sira”, tenik Profesór Romualdo.
Profesór Romualdo mós hato’o agradese ba ekipa husi Departamentu Enjeñaria Informátika, Fakuldade Enjeñaria, Siénsia no Teknolojia (FECT) ne’ebé mak kria ona website ba nia Fakuldade.
Partisipa iha Sorumutu ne’e Vise-Dekanu FCE, funsionáriu, dosente, ekipa kriasaun website husi FECT ne’e lidera Profesór Jose Pinto no estudante sira.
Média UNTL 📝 : Agostinho da Cruz e Silva
Foto 📷 : Agostinho da Cruz e Silva