TimorLeste #UNTL #VRAAGQ #COVID19 #COVID19TL 21 Fevereiru 2022
Universidade Nacional Timor Lorosa’e (UNTL) nia Visereitór ba Asuntu Akadémiku no Garantia Kualidade (VARGQ), Profesór Doutór Samuel Venâncio de Sousa Freitas, iha Kampus Sentral UNTL nian, Díli (16/02) hateten, kalendáriu akadémiku ba prosesu aprendizajen tinan letivu 2022 nian publika ona, iha loron 3 Janeiru no distribui ona ba fakuldade sira.
“Kalendáriu Akadémiku ne’e preve ona katak iha dia 7 Fevereiru aula semestre impár 2022 nian, maibé Fakuldade idaidak ajusta tuir realidade, tanba balun sei halo ezame no balun sei konklui aula ba semestre anteriór nian”, tenik Profesór Samuel.
Profesór Samuel mós konvida estrutura Fakuldade hotu, Departamentu no dosente sira atu aselera aula semestre tuan nian, hodi hahú fali semestre foun 2022 nian.
Iha sorin seluk, Dekanu Fakuldade Direitu nian, Profesór Isidoro Viana da Costa hateten, Fakuldade iha autonomia atu halo jestaun no administra aula tuir kalendáriu ne’ebé universidade publika tiha ona.
‘’Profesór balun mak sei atraza uitoan iha programa semestre pár 2021 nian, no Fakuldade autoriza atu kontinua to’o remata maibé Fakuldade estabele prazu ida másimu ba 16 enkontru iha finde Fevereiru tenki remata no sira ne’ebé hotu ona tuir kalendáriu normál iha dia 7 fulan ne’e komesa aula normalmente”, tenik Profesór Isidoro. 
Dekanu ne’e realsa tan katak, nia dosente sira sei konbina mós ho estudante sira atu bele fó tan aula-estra husi kalendáriu ne’ebé iha, atu bele kompleta ba enkontru dala 16 iha semestre ida nia laran.
Média UNTL 📝 : Laurindo da Cruz Gomes
Foto 📷 : Denilson Amandio Barros