#TimorLeste #UNTL #FMCS #COVID19 #COVID19TL 17 Fevereiru 2022
Universidade Nacional Timor Lorosa’e (UNTL) nia Magnífiku Reitór, Profesór dr. João Soares Martins, MPH, Ph.D, halo abertura ba revizaun kurríkulu Ensinu Superiór Parteira, Fakuldade Medisina no Siénsia Saúde (FMCS), ne’ebé sei hala’o durante loron tolu (17-19), iha Polo Universitáriu Gleno-Ermera (17/02)
“Ohin FMCS halo revizaun kurríkulu ba kursu Parteira nian, hodi responde ba rekomendasaun ANAAA nian ne’ebé avalia ba kursu parteira hetan notas B, maibé kada tinan sempre halo revizaun, nune’e bele hetan mudansa foun ruma iha servisu, siénsia, teknolojia no iha área kuidadu parteira nian, liuliu ba inan isin rua no ba labarik sira ne’ebé foin moris”, tenik Reitór.
Magnífiku Reitór hatutan, planu ba futuru atu rekruta tan profesór sira hodi garante kontinuidade eskola nia funsionamentu, presiza tau atensaun mós iha área peskiza.
Iha abertura ne'e, Dekanu FMCS nian, Profesór José Deonisio Ximenes, hateten, objetivu husi revizaun refere, atu hatan ba ezijénsia husi Ajensia Nasionál ba Avaliasaun no Akreditasun Akadémika (ANAAA) nian, ligadu ho kualidade formasaun, no prátika kontinua. 
“Objetivu husi revizaun kuríkulu ne’e atu hatan ba ezijénsia ANAAA nian, ne’ebé avalia ona konsege hetan nota B, ami konvida mós parseiru sira hodi fó informasaun di’ak liután, tanba haree ba esperiénsia sira liu ona, ami bele ajusta iha ensinu teoria no prátika, tanba tuir loloos revizaun tiha ona, maibé tanba pandemia tinan rua ba kotuk ami labele halo buat ida”, dehan Dekanu.
Dekanu husu nafatin ba dosente no estudante sira la’o ho objetivu ida de’it hodi kontribui ba mellora di’ak liubá futuru.
Atividade ne’e organiza husi Ekipa Eskola Superior Parteira-FMCS, partisipa husi, Visereitór, Proreitór, Diretór-Jerál, Diretór Nasionál no konvidadu sira.
Média UNTL 📝 : Leonia de A. da Costa
Foto 📷 : Leonia de A. da Costa