#TimorLeste #UNTL #GabCEDU #MESSK #COVID19 #COVID19TL 24 Janeiru 2022
Universidade Nacional Timor Lorosa’e (UNTL) nia Magnífiku Reitór, Profesór dr. João Soares Martins, MPH, Ph.D, ho ekipa Gabinete Sertifikasaun Dosente Universitáriu (GabCEDU), aprezenta progressu no planu servisu GabCEDU nian ba Ministru Ensinu Superiór, Siénsia no Kultura (MESSK), S.E. Longuinhos dos Santos, iha salaun enkontru MESSK, (24/01).
Magnífiku Reitór iha introdusaun hateten, promosaun dosente universitáriu UNTL nian, planu hamutuk entre Universidade ho Ministériu rasik atu promove grau ba dosente sira.
“Ajenda kona-ba promosaun dosente ne’e, planu hamutuk entre MESSK ho UNTL atu garante profisaun kareira dosente iha universidade sira, nune’e mós parte ida atu promove grau dosente sira-nian”, tenik Reitór.
Reitór agradese ba resposta pozitivu husi S.E. Ministru Ensinu Superiór, Siénsia no Kultura ne’ebé atu apoiu nafatin ba planu ida ne’e.
Iha fatin hanesan, Ministru Ensinu Superior, Siénsia no Kultura, S.E. Longuinhos dos Santos hato’o ba Mangífiku Reitór ho Ekipa GabCEDU nian, ne’ebé aprezenta servisu Gabinete nian durante ne’e. 
“Agradese ba GabCEDU ne’ebé ohin konsege apresenta progressu servisu Gabinete nian, depois bainhira submete ona dokumentu mai Ministériu, ha’u hatun ba asesór sira atu analiza detallamente, tuir mai mak ha’u sei enkontru ho Sr. Reitór”, tenik Ministru. 
Partisipa iha aprezentasaun ne’e, Proreitór ba Asuntu Planeamentu, Monitorizasaun no Avaliasaun, Profesór Nelson Salsinha, Ph.D, Diretór-Jerál GabCED, Profesór Doutór Rui da Cruz, ho nia membru estrutura sira, Diretora-Jerál Ensinu Superiór no Siénsia, Dra. Maria Filomena Lay Guterres, no ekipa tékniku no konvidadu sira.
Média UNTL 📝 : Agostinho da Cruz e Silva
Foto 📷 : Pio Belo Ximenes