#TimorLeste #UNTL #FEG-DCT #COVID19 #COVID19TL 27 Outubru 2021 - Universidade Nacional Timor Lorosa’e (UNTL) nia Fakuldade Ekonomia no Jestaun (FEG) liuhusi Departamentu Komérsiu no Turizmu (DKT) hala’o simulasaun no prátika otelaria ba estudante na’in ualunulu (80) ne’ebé programa materia Jestaun Otelaria.
“Sira hala’o prátika kona-ba prosesu servisu iha otelaria hanesan restaurante, koziña no oinsa serve bainaka, sira no sira mós hatene diferensa entre tau tudik, garfu, bikan no ida ne’e baziku tebes ba otelaria nian”, hateten Profesór Luis Simões dosente materia, iha Kampus FEG UNTL, (27/10).
Dosente ne’e mós hatutan prátika ida ne’e importante tebes atu lori estudante sira kompartilla teoria no prátiku nune’e, sira preparadu ba merkadu servisu nian.
Iha fatin hanesan estudante DCT, Manuel Gonçalves sente orgullu tebes liuhusi prátika sira bele hatene oinsa atu serve bainaka, no hatene mós lala’ok atu dobra guardanapu (hikar hena iha meza hamoos ibun nian) sira hodi tau iha meza.
“Ami aprende husi prátika ida ne’e mak oinsa ami bele halo mistura ba tua sira no aprende mós tein iha Otelaria nian nomós serve ema ho di’ak iha otél no ami atu bele sai rekursu ida ba iha área otelaria ninian”, dehan.
Média UNTL : Laurindo da Cruz Gomes
Foto : Laurindo da Cruz Gomes