#TimorLeste #UNTL #PN #COVID19 #COVID19TL 30 Juñu 2021
Universidade Nacional Timor Lorosa’e (UNTL) nia Magnífiku Reitór, Profesór dr. João Soares Martins MPH, Ph.D, asina Memorandu Entendimentu (MoU) ho Prezidente Parlamentu Nasionál (PN), SE Dr. Aniceto Longuinhos Guterres Lopes, iha Salaun Enkontru Parlamentu Nansionál nian, Díli (30/06), hodi servisu hamutuk iha kapasitasaun Rekursu Umanu.
“Ami konkorda tebes ho Señór Prezidente nia hanoin katak, kestaun rekursu umanu ne’e importante tebes ba instituisaun sira, liuliu ba Parlamentu Nasionál, no UNTL rasik, inklui instituisaun sira iha Timor-Leste”, tenik Reitór.
Aleinde MoU refere, Reitór mós kontente tebes ho inisiativa Prezidente PN nian, katak iha planu atu rekruta graduandu sira husi Fakuldade Direitu no husi Departamentu Kontabilidade iha Fakuldade Ekonomia i Jestaun nomós husi Fakuldade Filozofia.
Iha fatin hanesan, Prezidente Parlamentu Nasionál, SE Dr. Aniceto Longuinhos Guterres Lopes, hateten katak dadaun ne’e Estadu nia problema mak rekursu umanu tanba ne’e investimentu ne’e importante.
“Estadu tomak nia problema mak rekursu umanu, instituisaun Estadu tantu instituisaun polítiku no investimentu rekursu umanu ne’e, estratéjiku, tanba ne’e, kooperasaun ho ne’e UNTL importante atu fó oportunidade ba funsionáriu no tékniku PN sira kontinua sira-nia formasaun iha universidade nasionál", tenik Prezidente Parlamentu Nasionál.
Partisipa iha serimónia ne’e Visereitór, Proreitór no Diretór Nasionál sira, parte husi PN nian mak Prezidente Komisaun G, Deputadu António Verdial, no Deputadu sira seluk ho nia tékniku sira.
Média UNTL : Agostinho da Cruz e Silva
Foto : Agostinho da Cruz e Silva