#TimorLeste #UNTL #VPMMPO #COVID19 #COVID19TL 22 Juñu 2021
Universidade Nacional Timor Lorosa’e (UNTL) nia Magnífiku Reitór, Profesór dr. João Soares Martins MPH, Ph.D, akompaña husi Proreitór sira hasoru malu ho Vise-Primeiru-Ministru no Ministru Planu no Ordenamentu (VPMMPO), S.E. José Maria dos Reis, iha Gabinete VPMMPO Fatuhada Díli, (22/06).
Objetivu husi hasoru malu ne’e ko’alia kona-ba Reajustamentu Planu Estratéjiku Dezenvolvimentu Nasionál (PEDN) no envolvimentu Universidade Nasionál ba iha Prosesu Dezenvolvimentu Nasional iha tempu oin mai.
Magnífiku Reitór apresia tebes ho planu reajustamentu PEDN nian, tanba apar ho Planu Estratéjiku UNTL nian ne’ebé dadaun ne’e, iha ekipa ida atu renova ba períodu 2021-2030 nian.
“Reajustamentu ba PEDN apar ho ami nia Planu, tanba dadaun ne’e ami mós diskuti hela Planu Estratéjiku UNTL nian, nune’e, ami aposta mós ho PEDN nian, tanba Planu Dezenvolvimentu Nasional mak sai guia ba instituisaun sira hotu” tenik Reitór.
Profesór João mós konkorda atu envolve universidade iha Prosesu Dezenvolvimentu Nasionál, atu nune’e bele ativu liután iha prosesu Dezenvolvimentu Nasionál.
Vise Primeiru-Ministru no Ministru Planu no Ordenamentu, SE José Maria dos Reis, iha introdusaun hateten, iha ona planu hakarak lori uiversidade atu envolve iha Dezenvolvimentu Nasionál iha futuru.
“Ha’u hakarak lori Universidade atu envolve iha dezenvolvimentu nasaun nian, tanba antes ne’e ita akordu no liuhusi baze ne’e bele fasilita ha’u atu bele servisu hamutuk ba planu reajustamentu PEDN nian”, tenik Vise-Primeiru-Ministru.
Partisipa iha reuniaun ne’e Proreitór ba Asuntu Planeamentu, Monitorizasuan no Avaliasaun, Profesór Nelson Salsinha, Ph.D, Proreitór ba Asuntu Kooperasaun, Profesora Doutora Lídia Gomes, Proreitór ba Asuntu Dezenvolvimentu Institusionál, Profesór Lelis Gonzaga, no tékniku Gabinete VPMMPO nian.
Média UNTL : Agostinho da Cruz e Silva
Foto : Agostinho da Cruz e Silva